EDITORYAL - Ang gipakitang labok sa BIR batok tax evader
Dalaygon ang lakang sa BIR sa pagpasaka og kiha sa usa ka inilang negosyante ning dakbayan nga giingong wa magtinarong sa pagbayad sa buhis.
Mahimong tinuod o di, apan tungod kay giingong may mga ebidensyang gihuptan ang maong ahensya batok sa negosyante , gituohan sa mga tigpaniid nga kini tinuod.
Sa laing bahin kun gipanghimakak man kini sa akusado, aw bahala sila kun unsay sangpotanan niining tanan, basta sa bahin sa mga tigpaniid nga di maayo nga ang luokon pag-ayo sa goberno pagpabayad og buhis mao ang mga kabus nga mga kawani samtang ang mga dagkong negosyante pasagdan lang.
Di lang kay mga negosyante kundi mga professional, kansang kinitaan way resibo, ug kun may resibo man, kana rang baligya sa tindahan nga di madawat sa BIR.
Di na ta mohingan og mga professional apan ang tanan kahang mga doktor, abogado, enhinero, architect, ug uban pang mga professional relihiyoso kahang nagbayad og hustong buhis sa ilang kinitaan ngadto sa goberno?
Kay basin maayo lamang mopaghot kining ahensyaha sa mga kawani sa goberno ug pribadong sector, apan sa mga professional bahag na ang ikog niini
Kun may negosyante nga gipasakaan og kiha tungod niining kasoha, kumosta sa bahin sa mga professional, may napasakaan na kaha usab og kiha sa BIR?
Sa panahon ni Cristo ug sa Iyang mga Apostoles, may misuway baya sa pag-ikyas sa pagbayad sa ilang buhis kay di lang 10 porsento ang buhis nga gisingil kanila sa mga Apostol kundi 100 porsento gyud sa ilang kinitaan sa mahalin nilang kabtangan.
Apan si Ananias ug Sapira nga usa ka magtiayon nga mihimo sa ingon, pulos gipatay sa Dios sa atubangan sa mga Apostoles tungod sa ilang pagka-dishonest.
`Apan karon di na mga Apostol ang maningil sa buhis kundi BIR na, ug mapasalamaton kaayo ang mga tax-evader kay di na sila diha-diha patyon sa Dios.
- Latest
