Mga ang-ang ug ang mga sikolohikal nga implikasyon sa paglubong

2.3 emosyonal nga reaksiyon gumikan sa pagkawala Pinasikad sa Stage Theory ni Elizabeth Kubler Ross a. Pagkatay-og ( shock )- Diin ang kasinatian sa pagkatay-og sa namatyan ang nagpasabot usab og ang dili makapadayag sa usa ka emosyon. Mura lamang og walay nahitabo kaniya. Ikatingala kini sa mga tawo nga nagpalibot kaniya gumikan sa pagkawalay reaksiyon sa maong nagpalibot.Apan sa pagkatinuod ang hingtungdan ang apektado gyud sa maong pagkawala nga tungod niini aron paglikay sa mas dakong kadaot sa kaugalingong pagkatawo, ang nakaumol og usa ka pagkatay-og aron pagpanalipod kaniya sa dugang pang kadaot.

b. PAGDUMILI (denial)- Diin ang hingtungdan ang magdumili pagdawat sa kamatuoran nga patay na ang iyang mahal sa kinabuhi. Buot mohimo og pagtino ang tagtungod nga patay na gyud ang mahal sa kinabuhi pinaagi sa pagpangayo og laing mga opinyon sa  usa ka mananambal bisan kun tataw na gyud ang mga timaan sa kamatayon.

c.EMOSYONAL - Diin anaa ang posibilidad sa pagsinati og depresyon o dili ba kaha hallucination sa tagtungod. Pananglitan, ang bana kang kansang asawa namatay, ang mahimong makasinati nga anaa pa ang presensiya sa iyang asawa nga naglihok sa mga naandang buluhaton niini samtang buhi pa kini. Magsagol ang bation sa tagtungod sama pananglit sa kaguol,kalagot,pagmahay sa kaugalingon ug sa namatay mismo. Gikinahanglang ipabuhagay ang maong mga pagbati pinaagi sa paghilak, pagsinggit, pagngaab ug uban pa. Dili maayo ang pagluom kanila sanglit, makaapekto kini sa panglawas sa hingtungdan ug posible nga makahatag og kadaot.