Peke nga survey
Unang giapud-apod didto sa City Hall ang kopya sa giingon nga survey nga gihimo sa University of San Carlos College of Advanced Studies diin nagpakita nga nag-una si Mayor Michael Rama batok sa iyang kontra nga si Kongresista Tomas Osmeña.
Ang survey giingon nga gi-commission sa mismong partido ni Osmeña, ang Liberal Party. Ang kasayuran nga akong nahipos mao nga ang kopya sa survey gipanghatag ngadto sa mga sakop sa media sa usa ka konsehal sa barangay nga kaalyado ni Rama.
Tataw ang motibo sa pagpakatap sa giingon nga resulta sa survey. Buot ipakita sa nagpasiugda sa maong propaganda nga modaog si Rama batok ni Osmeña tungod kay mismong sa kaugalingon nga survey sa iyang partido pildi man ang naawahi.
Mamahimong epektibo ang maong paagi sa propaganda kun giayo paghimo sa mga propagandist sa Team Rama. Kini tungod kay nasuwayan na sa makadaghang higayon sa kasaysayan sa eleksiyon sa nasud nga ang survey usa ka epektibong matang sa kampanya. Kini tungod kay makondisyon ang huna-huna sa mga butante ug kinaiya sa kadaghanan nga adto mobotar sa nag-una sa survey ubos sa rason nga dili ta buot mausik ang atong boto.
Apan ang paggawi sa survey mamahimo sab nga dilikado ug makadaot na hinuon sa kandidatura kun dili mamaayo paggamit sa mga tawo nga gisaligan sa usa ka kandidato pagdala sa iyang propaganda.
Kini labi pa kun hilaw nga propagandist ang gikuha sa usa ka politiko. Abunda sa mga timailhan nga peke ang survey nga gipasiatab sa mga propagandist sa Team Rama.
Una kadudahan ang kopya sa survey tungod sa daghan nga mga timailhan nga kini binuhat lang sa usa ka tawo. Pananglitan gibutang sa kopya sa survey nga ang tinubdan niini mao ang Fact Book sa CIA kon Central Intelligence Agency. Tinuod dunay Fact Book sa CIA apan di katuohan nga lakip ang politika sa Cebu City ma-interest ang CIA niini.
Ikaduha, ang survey gihimo kuno sa USC College of Advanced Studies. Apan way College of Advanced Studies ang maong tunghaan. Mismo ang maong eskwelahan miluwat og pamahayag maylabot niini.
Ikatulo, dili katuohan nga ang Liberal Party mohimo og survey alang lang sa mayor. Mas dako ang interest sa partido sa mga kandidato niini pagkasenador unya wala hinuon ilakip sa survey? Klarong tinunto!
Maayo na lang gani kay wala gyud hingpit mosakay si Rama niini. Kay kung nahitabo pa nga nisakay dayon si Rama labihan unta kadako ang kauwawan nga iyang mahiaguman.
Tungod sa hitabo, maayo tingali nga sugdan na ni Rama pagpanaktak ang mga tawo nga nagpaluma-luma sa pagdala sa iyang propaganda.
* * *
- Latest
