Nganong may katalagman

Nag-ingon si Jesus “The truth shall set you free”.  Ang kamatuoran maghatag og kagawasan. Unsa may gipasabot Niya niini? Yano ra kaayo. Nga kinahanglan kita magsubay sa kamatuoran aron may kagawasan ta sa mga katalagman. Tungod kay wa gyuy nakasubay nato sa kamatuoran, sige lang tag agwanta sa lainlaing mga katalagman.

Ang pangutana, unsa mang mga kamatuoran ang angay natong subayon? Unsa niana ang matuod nga Diyos. Dayon, matood nga gugma sa Diyos. Unya, tinood nga relihiyon. Ug kinahanglan ang tanan tawo matinud-anon sa kaugalingon ug sa isig ka tawo. Natuman ba ni? Wala gayud. Maong sigi tang antos sa katalagman.

Ang mga tawo nabahin sa gobyerno ug simbahan. Sa gobyerno, wa gihapoy kamatuoran. Ang mga materyales sa mga proyekto, overpriced. Dili tinood nga presyo. Daghan pang mga bakak nga inpormasyon ilang gisabwag. Dunay mga empleyado sa gobyerno nga patay na. Apan siging kobra og sweldo. Sa simbahan. Way bisan usa nga simbahan ang nakatuman sa lagda sa tinood nga relihiyon. Busa, way kagawasan sa katalagman. Dunay daghang mga propetang bakakon sa lainlaing simbahan sa katilingban.

Daghang mga katawhan ang wa nagsubay sa kamatuoran. Bisan ang ordinaryong lab-asera. Mamakak kun pila ang kilo sa angkat niyang isda.

Makab-ut lang nato ang kagawasan sa katalagman kun magbaton ta sa hingpit nga kamatuoran. Kinahanglang duna tay tinood nga gugma sa tinood nga Diyos. Nagsubay ta sa doktrina sa tinood nga relihiyon. Matinud-anon ta sa kaugalingon ug isi’g ka tawo. Matinud-anon ta sa serbisyo o sa atong trabaho.