Estriktong wala sa lugar

Dili resignation ang tubag sa naghinobrang ka-estrikto ni Comelec chairman Sixto Brillantes kun dili ang pag-review sa iyang mga palisiya sa eleksiyon.

Daghan ang nakahulagway sa iyang gipakanaog nga eleksiyon nga nasobrahan. Apil na ang Korte Suprema sa nakalili sa sobrang ka-estrikto ni Brillantes.

Tinuod man nga ang reporma sa eleksiyon kinahanglan na gyud buhaton sa dali nga panahon aron usab mulambo ang politikanhong hulagway sa nasud, tungod ug alang sa demokrasya.

Apan mas maayong ilista ni Brillantes unsay angay niyang i-prioritize ug unsang mga butanga ang angayan niyang estriktohon kay sa uban.

Alang sa wala masayod, si Brillantes nakahukom pag-resign o pagpahulay sa makadiyot tungod sa sunodsunod nga desisyon sa Korte Suprema nga nagpakgang sa desisyon nga gipanakaon sa Comelec.

Una niini, ang Korte Suprema miisyu og temporary restraining order (TRO) batok sa desisyon sa Comelec pagpatangtang sa Team Patay/Team Buhay posters nga gipangtaod sa simbahang Katoliko.

Maayo ra sad. Nasobrahan ra si Brillantes sa iyang desisyon niining kasoha.

Nganong manghilabot man siya sa kalihukan sa simbahan? Tinuod nga naglambigit sa mga kandidato sa eleksiyon ang gisulat sa Team Patay ug Team Buhay, apan wala man kini mag-awhag diha sa poster nga pabotohan o paboykotan ang nakalista nga mga kandidato.

Usa pa, katungod sa mga Katoliko ang pagpadayag sa ilang tingog batok sa pagdalidali og pasar sa kontrobersiyal nga Reproductive Health law.  Kun wala’y gobiyerno nga nakapakgang sa mga pro-RH nga mihangop na og law-ay nga kampanya batok sa simbahang Katoliko, sama niadtong exhibit nga gibugalbugalan ang mga imahen sa Ginoo ug sa mga Santos, ug kadtong pagsinggit sa usa ka bayot sulod sa simbahan samtang nag-misa, ug pagdaot taman sa ginhawa sa anti-RH senator nga si Tito Sotto gamit ang cyber bullying, wala’y rason nga pakgangon sa Comelec ang pamaagi sa simbahan pagkampanya batok sa anti-life nga balaod.

Laing sagpa sa liderato ni Brillantes ang pag-remand sa Korte Suprema sa aksiyon sa Comelec pagpurga sa listahan sa mga party-list nga gustong moapil sa Mayo 13 nga eleksiyon.

Si Brillantes nasayod nga ang atong party-list system sa nasud gidominar na og mga party-list sa adunahan, impluwensiyado, suod sa Malacañang ug dili mga “marginalized sector.”

Apan girombo ni Brillantes sa iyang pagpanangtang sa listahan ang mga pordoy nga party-list, samtang gipabilin kadtong mga party-list kang kansang mga nominees mga adunahan ug wala maggikan sa marginalized sector.

Klaro sa Batakang Balaod ug sa balaod sa party-list system nga kadto lang nagrepresentar sa marginalized sector ang mahimong itudlo nga nominee sa party-list.

Ikatulong kaso nga nakapaminghoy ni Brillantes ang status quo ante order sa Korte Suprema batok sa circular sa Comelec pag-limit sa airtime sa radyo ug TV ug space sa mantalaan.

Ang 120-minute airtime sa TV ug 180-minutes sa radyo dili tubag sa gisinggit sa publiko nga patas ug angay-angay nga exposure sa mga kandidato. Kay mismo si Brillantes nasayod nga dili tanang mga kandidato mga kabus.

Kining maong airtime limit ma-aplay sa mga kandidato lokal o nasyonal.

Apan dili ko maka-imagine nga ang usa ka kandidato, hatagan lang sa Comelec og 120 minutos, sa ato pa duha ka oras lamang, sa ilang political ads unya sa tanan na kining estasyon.

Tagpila naman lang ka minutes matag estasyon?

Ang husto unta niini, buhatan og pamaagi sa Comelec nga hasta ang mga kabus nga mga kandidato makapasikat diha sa media, bisan wala sila’y kuwarta.

Ang makalagot nga palisiya sa Comelec mao ang pag-regulate sa mga interview sa politiko ug paghisgot kabahin sa mga politikong nanagan sa umaabot eleksiyon. Tiaw mo na, kun mobira o mohisgot kami og kandidato, kinahanglan pa kami mananghid sa Comelec.

Dili ba kini “prior restraint” sa among kagawasan sa pagpadayag isip mga sakop sa prensa?

Dili ko moapil sa panawagan sa uban pagpa-resign ni Brillantes.

Kay sa tinuod, daghan siya og nahimong reporma nga gikinahanglan kaayo diha sa Comelec.

Apan ang awhag nako kaniya mao ang pag-prioritize sa mga butang nga angayan ipa-ilawom sa reporma, dili kanang mga butang nga mahulog hinuon og sobra ra ug kataw-anan.

Bisan si Brillantes nakatimaho nga sobra ra siya ka-estrikto.

Maingon hinuong estrikto nga wala sa lugar.