EDITORYAL - Daghang di motuo kang Padre Robert Reyes

Naunsa  na ba kining  kalakiha  oi, imbis  daghang  misupak  batok niining  survey  sa SWS  nga  miingon  nga 37 porsento na lang kuno  ang  hinimbang  Katoliko  kay  di  kini  tinuod, gitiwasan  man  sab hinuon  pagpamatuod   sa  usa  ka pari  nga taga  Manila  ang  maong  survey.

Sa gula  sa The Freeman  niadtong  Abril 14, 2013  sa panid 23 gipamatud-an ni Padre Robert Reyes  nga  siya  mismo  nakamatikod  nga  mikibra  na  pag-ayo  ang  hinimbang  Katoliko  sa parokya  nga  iyang  nadestinohan.

Gisibya  pa  gyud  kuno  kini  ni  Padre Reyes  sa DZMM  niadtong  Biyernes, Abril 12, 2013  nga  matud  pa  usa  sa hinungdan  niini  mao  ang ka-“boring”  o kapuol  kuno  paminawon  sa  mga  sermon  sa kaparian  nga  magmisa hinungdan  nga  di na ganahan ang  manimba  maminaw    kay  bisan  unsa  na lang  isyuha ang hisgotan.

Ikaduha  kunong  hinungdan  nga  laayan  manimba  ang  ubang  mga  Katoliko  mao  kanang  kolektahan sila og    amot  inigtambong  nila sa misa.  

Unya   giyagyag   ni Padre  Reyes  ang  tinuod    nga  wa  na gyu’y  lami paminawon  ang  ilang  mga   sermon   kay kuwang  ang  mga  pari  sa preparasyon bahin  sa  mga  butang  nga  ilang   isermon.

Ang  hinungdan  kuno  niini  mao  ang   pagbalik-balik  nila  og  misa matag  Domingo  hinungdan  nga mahutdan  sila  og  isyu  nga isermon  ngadto  sa mga  manimba  busa wa nay ganahan  manimba.

Mao  diay  nga  sa survey  sa SWS  daghan  kunong  moingon  nga naghunahuna  na  sila  pagbiya  sa Katoliko.

Pero  kun  ingon  man  niini  ang mentalidad  sa  mga  Katoliko  sa Manila, lahi  dinhi  sa Sugbo  kay  hinugtanay  sa bakus  ug  lunod  patay  ang  mga  Katoliko dinhi bisan wa sila masayud  kun  may kaluwasan ba  sila sa ilang gibuhat.

Gani  way  pagkapuol  ang  pagkahinimbahon  sa mga  Katoliko hinungdan  nga  matag  misa  mosugwak  ang  ilang  mga  simbahan.

Sa Biblia gitudlo   nga  ang  pagsimbang  tinud-anay  ngadto  sa Dios, may  pag-awit,  may  pag-ampo, may pagtulun-an  nga  may  paghubad, ug  may  paghalad ug ang tinuod  nga  magsisimba  sa Dios  mosimba  sa Iyang  espiritu  ug  kamatuoran tungod  kay ang Dios espiritu  ug  di makita busa wa  Siya’y  larawan.

Sa  Biblia  gitudlo  nga  ang angay  isermon  sa  mga  magtutudlo nga piniyalan   sa Dios   sa panahon  sa pagsimba  sa Iyang  mga  anak  mao  ang  bahin  sa Iyang mga  pulong   ug  ni  Cristo  nga  nahisulat  sa Biblia  nga  nagtudlo  og  kaluwasan  sa tawo  pag-abot sa adlaw sa paghukom.