Kuyawa ani uy!

Atensyon mga kauban nako nga road law enforcers! Susiha ra ninyo kining report nga akong nadawat nga adunay multicab (GXG 249) nga nagbiyahean Compostela-SM Whitegold nga ang gihimong tangke sa gasolina sudlanan sa mineral water.

Sigun sa report nga ang gallon sa mineral water anaa ra gibutang duol sa drayber. Kun tinuod man gani kini, nagduda ko nga guba tingali ang fuel pump sa makina mao nga gituyo nga anha ibutang ibabaw sa makina ang gasolina.

Peligroso kaayo ni, dakponon. Atensyon mga sakop sa Land Transportation Franchising and Regulatory Board (LTFRB), ilabi na ni direktor Ahmed Cuizon ug sa higala nako nga si Ariel Yburan.

* * *

Dunay ubang drayber, kusog kaayo mag-ulog-ulog nako. Kinaham kuno nila ang akong lindog kay prangka ko, apan supak man sila sa estrikto nga pagpatuman sa balaud sa pagmaneho og sakyanan.

Abi ninyo, estrikto kaayo ko mopatuman sa balaud kun musalmot na ko sa among operation kay dili man gud ko abusado nga pagka motorista. Tumanon lang gud nato ang balaud para mahimo ko ninyo nga higala.

Kusog kaayo mo mulapas sa balaud unya kun madakpan moreklamo nga suspensuhon ang inyong lisensya. Tiaw mo bisan sa pagsul-ob og uniporme para sa drayber dili makahimo? Nagpaila kana sa inyong kaabusado.

Kinsa ba kining “police asset” sa usa ka polis sa Dalaguete nga ang ngalan “Jiji” nga nagsige gihapon kuno’g dala-dala og armas? Mao kini ang miabot kanako nga report. Palihug sir Pat Comendador ipasusi ni.

Unya diha sa Pangdan, Naga, mga polis aksyoni ra gud ninyo palihug kining reklamo sa grabeng tigbakay diha duol sa high school kay usa kini sa giingong rason nga misiaw na ang pagpangawat diha.

Unya, atensyon mga LTO enforcers, dunay mihangyo nga aksyonan g’yud ang overloading sa mga bus, labi na kining Calvo nga para Balamban kay magsugwak g’yud kuno pirmi ang pasahero ug masuko pa ang konduktor kun moreklamo ang ubang pasahero.

Mga sakop sa Probe nga gidumala ni Ma’am Raquel Arce, may mireklamo sa giingong nagpatunga na g’yud sa karsada nga mga tindera’g lainlaing baligya diha sa dapit Legaspi duol sa Barangay Hall.

Unya, sa mga tigbaligya og imahen luyo sa Basilica, duna na sa’y pipila nga misugod og abuso kay migawas na sa puthaw nga railings sa ilang pagpamaligya.

Kamong akong mga inpormer, kun mo-report mo nga dunay protektor sa illegal nga kalihukan, itug-an kun kinsa, dili kay igo lang moingon nga “dunay polis protektor” kay wala tay mahimo ana. Sama sa report nga akong nadungog nga kuno mga polis sa usa ka lungsod protektor sa shabu, paita uy.