Comelec ug Ombudsman pulos paghut way paak

Nitumaw na ang isyu kalabut sa mga bahandi nga gitaguan didto sa gawas sa nasud sa mga pulitiko.

Nasayran nga sila si Kong. JV Ejercito, Gob. Imee Marcos ug Sen. Manny Villar adunay investment didto sa British Virgin Islands (BVI).

Dili kita mahibung kang Villar kay adunahan man kini siya. Apan ang problema kun wala kini niya ideklarar sa iyang statement of assets, liabilities and networth (SAL-N).

Ang kang Marcos gitohuan nga apil pa kini sa bahandi nga gitaguan sa iyang amahan nga si anhing Pres. Ferdinand Marcos. Wala usab kuno kini maapil sa iyang SAL-N.

Ang wala mahatagi’g katin-awan mao ang kang Ejercito. Diin man gikan kining iyang kwarta nga dili man siya bahandianon?

Ang kadudahan pa gayud kay inay iyang tubagon ang pangutana igo lang siyang mopasangil sa iyang mga kaatbang sa pulitika nga mao kunoy nagpayagyag niini. Sa mga bata pa, klarex!

Ako nagtoo nga anaa pay daghang pulitiko nga nagluklok og dakung bahandi sa ubang mga dapit labi na sa mga bangko sa BVI ug sa Switzerland.

* * *

Nagparehas lang kining Commission on Elections (Comelec) ug ang Office of the Deputy Ombudsman in the Visayas nga pulos pagarpar.

Sama sila sa iro nga kusog kaayong mopaghut apan dili mopaak. Ang uban moingon nga sila mga paper tigers.

Kining Ombudsman maayo kaayong moawhag nga isumbong ngadto kanila ang mga taga gobiyerno nga makahimo og sala sama sa graft and corruption.

Makahimo man gani unta kini sila sa pag-imbestigar moto propio sa mga salaud nga mapatik sa pamantalaan ug mahisgutan sa radyo ug telebisyon nga dili na maghuwat og reklamante.

Apan anaay sumbong nga gipasaka batok sa mga dagkong pulitiko nga gilingkuran nila. Sama gud sa sumbong ni Mayor Michael Rama batok kang Kong. Tomas Osmeña kalabut sa sakyanan nga Dodge Charger nga gikan sa Bigfoot.

Dili na lang nako ilitaniya dinhi ang daghan pang mga kaso nga daw nahug sa linaw ug natunaw.

* * *

Sa laing bahin, ang Comelec mora gyud og korek nga magpasidaan ug mohulga sa mga pulitiko nga ila gayud kining silotan kun makalapas sa balaud ug sa ilang lagda ug reglamento.

Unsa may nahimo sa Comelec sa kalapasan sa mga kandidato ug sa ilang mga tawo nga nagpataka lang og papilit sa mga campaign material gawas sa designated areas?

Igo man lang moingon ang Comelec nga kun dili kini tangtangon sa nakabenepisyo niining mga poster ug streamer sud sa tulo ka adlaw human nila madawat ang ilang awhag ila kining pasakaan og sumbong ug silotan sigun sa balaud.

Unya dili ba sila pabayron og danyos sa kadaut sa mga kahoy ug sa kahugaw sa mga bungbong ug poste nga ilang gipapilitan sa ilang mga materiales?

Alang kanako kinahanglang imbestigahon kining mga malapason ug silotan sigun sa balaud kun makitang sad-an. Mao ra kini ang paagi nga sila makasabot ug mutoo nga aduna diay ngipon kining Comelec.

* * *

Makasalig pa ba si Kong. Tomas Osmeña sa iyang mga tawo? Nangutana ko niini kay klaro kaayong namakak ang iyang tawo nga nagsulti kaniya nga tres mil lang ka mga tawo ang nitambong sa "Panagtagbo" kon proclamation rally sa Team Rama.

Samtang ang kapolisan mibanabana nga mokabat sa 30 mil ang nitambong sa maong rally ang batabata ni Osmeña nipahibawo kaniya nga tres mil lamang ang nanambong.

Klaro man unta nga mas daghan pa gani kadto kay sa rally sa United Nationalist Alliance (UNA).

Kuyawan ko nga dili usab tinuod ang resulta sa ilang survey nga nagpakita kuno nga sila ang nag-una.

* * *

Ang Cebu Vendors Credit Cooperative (CVCCO) mohimo sa ilang 2nd Annual General Assembly karong Abril 14 adto sa Cebu City Sports Club (2:00 - 7:00 pm).

Ang tema karong tuiga mao "CVCCO Connecting for a Bright Future." Kini ang gipahibawo ni Mrs. Melie ug Linlin Uraca.

Email: msr1144@yahoo. com