Pagpamalandong alang sa Malangkubong Kaayohan

Ikalimang hilisgutan: Ang proseso sa dili pa himuon ang eksorsismo

PAHINUMDOM

D. Ang silyo

Ang silyo mao ang usa ka espirituhanong panalipod sa yawa batok sa pag-atake sa eksorsista. Nahitabo kini gumikan sa paghalad nga gihimo ngadto kang Satanas nga posibleng gihimo sa biktima mismo o dili ba kaha sa laing tawo. Matud pa nila ni Francis MacNutt ug Mother Nadine nga kinahanglang gub-on una ang maong silyo sa dili pa himoon ang pag-ampo sa pagpalingkawas o deliverance.  Ampoon kining mosunod sa makatulo: “Sa ngalan ni Jesus, akong pagagun-obon ang silyo libot kanimo!

E.Panimalos Gikan sa Dautang Espiritu

Agi’g pagpakita sa kapungot ug kalagot ang dautang espiritu ang mohimo gayud og usa ka panimalos ngadto sa biktima o dili ba kaha sa eksorsista mismo. Adunay mogawas nga daw mga kinawrasan sa panit sa biktima mao nga himoon sa eksorsista o ni bisan kinsang natahasan ang pagdihog niini og exorcized oil, bendita  o dili ba kaha ang pagtapion sa tumoy sa estola sa pari ngadto sa naapektuhang bahin sa lawas sa biktima. Alang sa mga nalambigit sa exorcism team o deliverance team ang mohimo gyud og cleansing prayer ug magpuyo sa landong sa grasya sa Dios aron magpabilin silang mapanalipdan gikan sa bisan unsang panimalos gikan sa kaaway. -- Sumpayan pa