Isda mo diha

Pilar, Siargao, Surigao del Norte — Sa ikaduhang adlaw sa among pangisda dinhi niadtong Biyernes, nakakuha mi og sailfish. Ginganlan og “liplipan” dinhi, na ila nga “malasugi” sa Sugbo. Tungod sa iyang kaabunda ug kadagko ning bahina sa Pacific Ocean, ang sailfish maoy nahimong logo sa International Game Fishing Competition nga ipahigayon dinhi matag Abril. Karong tuiga, sugdan ang panagtigi sa lokal ug langyaw nga mga mangingisda sunod semana.

Ang sailfish may timbang nga 15 ka kilo, o 33 kalibra. Ang nakabira mao si Vic Vergara, umagad ni Consul Emeritus Arcadio “Dodong” Alegrado, nga maoy ni dapit namo pagpangisda dinhi. Naabtan mi og tunga sa oras pagkuha sa isda, nga labihang kiata nga naglibutlibot sa among bangka sa wa pa hingpit nga motahan.

* * *

Human gitimbang ang sailfish pagdunggo namo, gilaplapan dayon ni Santiago Gonzales Jr., ang boatman nga nabantog sa lokal ug langyaw nga mga mangingisda dinhi, og usa ka kilo ug gikilaw uban ang asgad nga suka ug pino nga luy-a. Haskang busdika sa among paniudto.

Sinugba na sab nga sailfish ang among sud-an sa panihapon. Labihang tamboka ug puno pa sa duga sa puwahon nga karne. Sunod sa pangisda, ang lab-as ug lamian nga mga isda ug mga utanon ug kamahigalaon sa mga molupyo dinhi maoy gibalikbalikan sa lokal ug langyaw nga mga turista.

* * *

Di sab mabentahaan ang mas una namong nakuha niadtong Huwebes nga barracuda, nga mas na ilang “rumpe de candado” sa Sugbo, nga na bira ni Domiko Ugarte, kamaguwangang apo ni Consul Alegrado. Gipaprito, gipatowa ug gipa-inun-onan ni Sir Dodong kinsa nisugyot nga maniudto mi og ka duha.

Way usang nisupak. Akong nabantayan nga mas parat kay sa kasaranganang timpla sa pinirito. Dihang akong gihunghongan ang kusinera nga nakatsamba siya kay himarat si Sir Dodong, ni bawos siya og hunghong nga nakabantay na siyang daan nga labihang daghan ang asin sa mani nga dala ni Sir Dodong sa pagpangabot pa namo niadtong Huwebes.

* * *

Subo hinuon ang sugilanon nga among nakuha gikang Mario Galope, ang tagduma sa beach house ni Sir Bong Castillo nga maoy among gipuy-an dinhi. Nagsugod nang kanihit sa sailfish ug ubang isda dinhi. Lahi sa nangaging katuigan nga magdungan-dungan og kubit ang mga isda, tagsa na lang ang mosubad sa ilang mga paon sa niaging pipila na ka tuig.

Gisubay ni sa lokal nga mga mangingisda sa pagsugod og dagsang napu ka tuig nang nilabay sa mga mangingisda gikan sa silingang lungsod sa General Luna. Uban sa lapad nilang mga pukot nga nisilhig sa tanang isda nga maagian sa tibuok gabii matag gabii nilang ilegal nga kalihokan. Way nakabadlong kay mga polis ug mga politiko ra sab ang financiers. Hinaot nga makamata ang BFAR ug ubang mga buhatan sa di pa mapuo ang mga isda dinhi.

* * *

Email:[email protected]