Carjacking nauso sa Manila

Niining bag-o, among kaubang opisyal nga atua madestino sa Manila gigukod og mga carjackers. Samtang siya nagdrayeb, pag-abot niya sa may nagkuros nga dalan, misiga ang red traffic light. Busa napugos siya  paghunong. Dihang...

Kalit lang nga may mituyog dumbol sa likod sa iyang Sports Utility Vehicle (SUV) -- usa ka motorsiklo nga gisakyan og duha ka lalaking naka-helmet. Tungod kay nagduda siya nga mga daotan kining tawo, gitawagan niya sa selpon iyang bana, kinsa mitambag nga dili gyud mogula ug manaog. Hinuon, gidasig siya nga mopadayon lang sa pagpadagan kun mo-GO signal na. Tuod man, iyang gituman ang instruksiyon sa iyang mister.

Apan pag-abot niya sa laing intersection, dunay laing motorsiklo nga gisakyan gihapo’g duha ka lalaki ang miapil sa pagsunodsunod niya, kinsa nagpulipuli’g dumbol sa likod nga bahin sa SUV. Iya pang nakita sa side mirror nga misulay ang usa kanila sa pag-abli sa likod nga passengers seat. Ning tungora, gimandaran siya sa iyang bana nga i-on ang hazard lights sa sakyanan ug magsige’g patingog sa sirbato. Buwahan, kun may mga pulis nga makakita ug  makadungog, masuyop ang atensiyon ug dako ang kahigayonan nga matabangan siya.

Imbes mahadlok ang mga lalaki, misamot hinuon ka-agresibo. Misamot kadul-it ang pagsunodsunod ug nagpadayon sa pagpunay’g dumbol sa tuong likod sa SUV. Hinuon, wala gyud maratol ang babaye nga opisyal. Gani, abtik man ang iyang tudlo nga mi-dial sa Police Hot Line: 117. Ug wa mausik ang iyang tawag. Kay natilawan man niya ang tabang sa taga National Police Headquarters sa Camp Crame, Quezon City, diin didto niya isulod ang iyang sakyanan.

Human niya isugid ang tibuok nga hitabo ngadto sa mga pulis, didto pa siya mahibalo nga mga carjackers diay kadtong mga tawhana, kinsa dali rang nahanaw sa panan-aw sa mga police patrol nga mogukod-dakop unta sa naasoy’ng mga masamang damo.