Wala mosaler ang pagbabag ni Mike
Sama sa gipaabot gi-override sa konseho sa dakbayan ang veto ni Mayor Michael Rama sa ordinansa nga nag-usab sa schedule sa pagpanghatag sa financial assistance alang sa mga senior citizens.
Kini nagpasabot nga madawat na sa mga senior citizens ang hinabang salapi gikan sa kagamhanan matag buwan.
Nawad-an og bili ang pagbabag ni Rama nga matag buwan ihatag ang hinabang tungod kay mayoriya sa mga sakop sa konseho wala mouyon sa gusto sa mayor.
Ubos sa ordinansa nga giaprobahan sa konseho madawat sa mga senior citizens ang cash assistance matag unang Lunes sa buwan sugod sunod buwan.
Gisupak ni Rama ang maong paagi tungod kay iyang gusto nga matag-tulo ka buwan usa himuon ang pagpanghatag sa hinabang. Rason ni Rama mao nga lisod ang paghimo nga binuwan tungod kay dili kuno madali ang pag-andam sa listahan.
Samtang ang mayoriya sa konseho buot nga matag buwan gyud ihatag aron magamit sa mga tiguwang ang kwarta pagpalit sa mga tambal nga ilang gikinahanglan labi pa niadtong dunay maintenance.
Wala koy nakitang igo nga rason nganong gisupak ni Rama ang kabubut-on sa konseho. Kun ang hinungdan mao lang ang kalisod sa pag-andam sa listahan sa mga beneficiaries, taphaw ra kini kaayo.
Dili man tingali lisod ang paghimo niini tungod kay di man unang higayon nga sila manghatag sa maong hinabang.
Buot ipasabot nga duna na silay daan nga listahan sa mga beneficiaries. Wala ni kalainan sa pagpanuweldo sa mga kawani sa dakbayan matag buwan.
Sistema lang ang gikinahanglan aron epektibo nga mapatuman sa dakbayan ang pagpanghatag sa hinabang nga dili makompromiso ang kahimtang sa panglawas sa atong katiguwangan.
Pananglitan, nganong dili man ipaagi na lang sa ATM ang pagpanghatag niini? Sa maong paagi malikayan nga magdasok ang mga senior citizens aron pagkobra sa kantidad nga alang nila.
Mas hapsay ug dali ang maong paagi malikayan pa ang posible nga disgrasya sa mga masakiton na nga mga tiguwang.
Kung ang gikabalak-an sa mga opisyal sa dakbayan nga dunay mga patay nga makahimo gihapon pagkubra kun ipaagi sa ATM mamahimo man tingali ni nga mapangitaan og sistema aron pagsiguro nga way patay nga mokobra.
Pananglitan dunay binuwan sab nga validation sa listahan sa mga beneficiaries pinaagi sa mga barangay.
Ang nakadaot gud gusto man himuon nga puhonan sa politika ang mga tiguwang. Gusto gyud nga personal nga makita ang mga senior citizens aron sila makapangampanya.
- Latest
