Ang oil smuggling ug corruption

Gibulgar ni Ramon Ang, Chairman ug Chief Executive Officer sa Petron Corporation nga nalugi ang gobyerno og bilyones ka pesos sa dapat makolekta niining buhis sa mga nagnegosyo og produktong petrolyo sa nasud. Kini tungod kay one-third o usa sa tulo sa kinatibuk-ang gidaghanon sa produktong petrolyo nga misulod sa nasud gikan sa tuig 2007 hangtod 2011 mga pinalusot ug wala makabayad og buhis.

Gibana-banang anaa sa 30 ngadto sa 40 bilyones ka pesos ang wala makolektang buhis sa gobyerno matag tuig niadtong mga nagpalusot og mga produktong petrolyo dinhi sa nasud. 

Ang dakong opisyal sa Petron Corporation nga si Ramon Ang mibasi sa iyang pasangil sa gidaghanon sa mga sakyanan nga narehistro sa nasud ug sa gidaghanon sa mga retail ug service station nga namugna sa ilang kompanya.

Si Ang nagkanayon nga bisan pa sa pagsaka sa gidaghanon sa mga narehistrong sakyanan sa nasud gikan sa 5.5 ka milyon ngadto na sa 7.1 ka milyon sa tuig 2007 hangtod 2011 ang retail ug service station sa Petron Corporation nagpabiling pislat (kun naligid pa) ug wala gayod kini moburot. Dugang pa ni Ramon Ang nga sa miaging tuig lamang ang nasud mikonsumo og 110 ka milyon ka barel nga lana diin ang katunga niini gipalit gikan sa gawas sa nasud nga mga finish product na.

Sa produktong petrolyo nga gipalusot, kinsa naman usab ang basulon niini, ang Bureau of Customs? Kun ang nahisgotang buhatan ang basulon, motoo kaha kita nga wala ni sila diktahi sa mas taas pa nila og katungdanan sa atong kagamhanan? Sigun sa akong nahibaw-an ang mga nakalusot gituyo gayod sa pagpalusot ug kun duna may nakalusot nga wala gayod palutsa pila lang ni ka podyot.

Ang pagpalusot sa mga produktong petrolyo ug bisan sa unsang mga produkto nga gipalusot dinhi sa nasud kabahin gihapon kini sa grand corruption nga nakabasi sa Malakanyang. Kanang anaa sa Bureau of Customs mga pinisik lamang.