Tingog sa Haring Lungsod

Inay magpaabot sa way kinutoban nga mga saad ug pasalig sa mga politiko, nga maoy naandan sa nangaging mga piniliay, among gidasig ang suking mga tigpaminaw sa “Arangkada” sa DYAB 1512 khz ug mga tigtan-aw sa “Maayong Buntag, Kapamilya” sa Channel 3 sa ABS-CBN Cebu unsay labing dagko ug dinalian nilang mga panginahanglan nga kinahanglang tukion ug hatagan og tukmang tubag sa mga magpapili sa eleksiyon karong Mayo 13.

Akong gilista ang ilang mga tubag sa ubos aron pagdasig sa ubang mga botante sa pagtingog ug pagpakabana sab ug pagtabang sa mga magpapili paghimo sa ilang kampanya nga mas mapuslanon ug mas makahuloganon:

* * *

• Pagsangkap sa mga tambalanan sa gobyerno sa kalungsoran ug mga dakbayan aron mahimo nilang mas takos sa pag-atiman sa labing kabos ug labing masakiton sa katawhan;

• Mas subsob nga pagkolekta sa basura aron nga di mangalisbo ang palibot ug di mameligro ang kahimsog sa mga molupyo gikan sa dengue, mga sakit sa ginhawaan ug ubang epidemiya;

• Pagtapak sa mga libaong, pagpalapad sa kadalanan, pagtarung pagduma sa trapiko, pagdisiplina sa badlungon nga mga motorista, pagsikop sa kolorum nga mga sakyanan ug paghawan sa ilegal nga mga istruktura;

• Paghimong mas luwas sa katilingban ug pagpanalipod sa katawhan gikan sa mga kawatan, mga tulisan ug mga mangingilad;

* * *

• Pagmugna og dugang kahigayonan sa trabaho ug patigayon, pagpausbaw sa minimum nga suholan ug benepisyo ug pagpanalipod sa mga mamumuo gikan sa panaugdaog sa mga tag-iya sa puhonan;

• Pagsegurong makiangayon ang presyo sa nag-unang mga palaliton, pagpatigbabaw sa batakang katungod sa mga konsumidor ug pagsilot sa uban pang mga maniobra sa mga negosyante;

• Pagbadlong sa pangurakot sa tanang ang-ang sa burukrasya, pagpatigbabaw sa kaligdong ug paghimong mas sayon ang mga transaksiyon sa gobyerno; ug

• Pagpalig-on sa sistema sa hustisya, pagpaspas sa husay sa mga kaso sa hukmanan ug pagsegurong kasilotan ang labing dagkong mga kawatan, drug lords, gambling lords ug ubang labing bangis nga mga kriminal.

* * *

Nagpakatakos mi pagpahinumdom sa katawhan nga sila--di ang mga politiko--maoy tinuod nga hawod sa piniliay. Nga ang mga botante--di ang mga magpapili--maoy magbuot unsay tukion sa nagpadayong kampanya. Nga sila ang tinuod nga Haring Lungsod ug ang mga nangindahay sa ilang mandato mao ang ilang mga suluguon.

Hinaot nga ang katawhan di na magpatara. Ug igo lang mopaundayon sa bisan unsa na lang pakauwaw nga mahunahunaan sa mga politiko. Ang katawhan maoy tinuod nga hawod. Di lang atol sa kampanya nga sila maoy sentro sa tanang ulug-ulog. Kun dili, ug labi na, hangtod human sa piniliay. Bisan kinsay makalingkod sa katungdanan angay’ng bantayan sa tanang higayon. Pagseguro nga ilang ipatigbabaw ang labing dakong kaayuhan sa labing daghan.

* * *

Email: [email protected].