Pari way tingog-tingog nagpakalawat

Makapahiubos ang gibuhat sa pari ngadto sa mga nangalawat sa ika-alas 8:00 sa buntag nga misa niadtong Martes, Marso 26, 2013. Kutob sa midawat sa Lawas ni Kristo naglibog kun motubag ba silag “Amen” kay ang pari igo lang mitunol og ostiya nga walay tingogtingog.

Sanglit wala man mosulti’g ‘Lawas ni Kristo’ ang alagad sa simbahan, wala na lang poy gisulti ang mga nangalawat. Nahimong amang ang mga gutlo sa pagpangalawat niadtong higayona.

Apan pag-abot sa turno ko, gitan-aw gyud nako ang hitsura sa pari, gipaabot nga mabuka ang iyang baba ug moingon: “Lawas ni Kristo”. Pastilan, wala man gyud! Pagpunit niya sa ostiya ug pagpaduol niini sa akong ngabil, bisan nagpabilin siyang amang, misulti gihapon ko’g “Amen.”

Ingon sa nahiwa akong kasingkasing sa gihimo sa pari. Kadaghanan gud sa mga kura paruko mopahinumdom man gani sa mga tawo nga: “Inig pangalawat, kusga ang inyong pagtubag og Amen human mosulti ang pari og lawas ni Kristo.”

Gikan nila ang maong sugo. Unya nganong wala man kini tumana sa maong pari, kinsa maoy mipakalawat namo niadtong pagsimba ko sa Sto. Rosario Parish Church sa miaging Martes? Maayo ba kini nga ehemplo? Hinuon, dili lang kadtong paria ang mahimong amang ini’g pagpangalawat. Anaa pay laing pipila.

Cebu Archbishop Jose Palma, nganong ingon man niini ang kinaiya sa uban nimong mga kaparian? Gikapoy na ba sila sa pagsilbe sa Ginoo ug sa iyang katawhan? Pwede ra ba diay mopakalawat ang pari nga walay tingogtingog? Palihog, pasabta kami nganong gibuhat man kini nila, Archbishop Palma?