Happy Easter Sunday!

Marso 31, 2013. Domingo. Adlaw sa pagkabanhaw sa atong Ginoo. Sa  Facebook, Twitter, o uban pang website sa internet ug mga selpon mobaha ang madasigong timbaya nga gipulong sa tulo ka pulong: “Happy Easter Sunday!”

Ang pangutana mao: “Sa pag-greet og Happy Easter Sunday, nahibalo ba ang tanan sa tiunay nga kahulogan niini? Managsama ug usa ra bay buot nilang  ipasabot nganong angay’ng magmaya sa pagkabanhaw ni Hesukristo?”

Subo kaayo palandungon nga sagad sa mga tawo kinsa panahon sa Holy Week naghapihapi sa pagpangaligo sa beach resort, namakasiyon pahayahay sa nindot nga lugar, nanag-inom ug nanagsugal, maoy unang mga linalang nga moteks, mo-chat, mo-tweet ug mo-email ngadto sa ilang mga suod nga higala ug kaparyentihan niining mga pulonga: ‘Happy Easter Sunday!’ pag-abot gayod sa adlaw’ng Domingo sa Pagkabanhaw. Morag gipakasama lang bitaw nila ang maong adlaw nga anaay nag-birthday o nagsaulog og piyesta, diin yanoyanohon lang ang pag-ingon: “Happy birthday! Happy fiesta!”

Tinuod ba gayod nga happy ang ilang Easter Sunday? O, wala sila makasabot sa  ilang gisulti?  Kay ang angayang magmaya panahon sa Easter Sunday mao kadtong mga tawo, kinsa nagsakripisyo ug nagpakamatay panahon sa Semana Santa. Buwahan, pag-abot sa Easter Sunday, mabanhaw sab sila uban ni Hesukristo. Ang ipasabot ko sa pulong ‘nagsakripisyo ug nagpakamatay’ mao: Nga panahon sa kuwaresma, labi na sa mga Adlaw sa Semana Santa, ang mga makasasala, kinsa dugay nang nahilayo sa Diyos, migahin og igong panahon sa pagpakig-reconcile sa atong Manunubos pinaagi sa kinasingkasing nga paghinulsol sa ilang mga sala. Uban kanila, nag-fasting. Ang wala nay simba, misulod na’g balik sa balay sa Diyos, nangayog pasaylo, nagpuasa ug nahimong aktibo sa mga relihiyosong buluhaton. Tanan nilang sala nga maoy miulipon sa ilang kahuyang kanhi, giibot ug giluka aron malimpiyo ang ilang tanlag. Oo, nagpakamatay sila aron mabuhi pag-usab!

Silang mga karnero, kinsa dugay nang wala, mibalik sa mga kamot sa Diyos panahon sa Holyweek, ang angayan maglipay. Sila kadtong usa sa duha ka kawatan nga gi sultian ni Hesukristo: “Karon, Karon Dayon, Mahiuban Ka Kanako sa Paraiso. Sila ang tukmang tawo nga dapat teksan og: “Happy Easter Sunday!” Kay dungan sa pagkabanhaw ni Hesukristo, sila nabanhaw usab. Ug dili kadtong mga anino, kinsa padayong nagpaulipon sa kalipay nga iyaha ni Satanas nga wa gyod matarog bisan pa sa mga balaang adlaw, diin gikuhit sa Ginoo sa pagbag-o.