Dakong leksiyon
Usa ka dakong leksiyon ang pagka-dismiss ni Judge Rosabella Tormis sa Korte Suprema dili pa lamang dugay. Magsilbi usab kining seryosong warning ngadto sa pipila nga nagtinapulan ug nag-abuso sa ilang katungdanan.
Nakit-an sa Labaw’ng Hukmanan nga nakalapas si Tormis sa rules and regulations sa Supreme Court ug nga nagmika kini sa iyang katungdanan tungod sa wala pagresolbar sa daghang kaso sa iyang sala.
Sa desisyon niini, matud pa sa Supreme Court nga klarong adunay gross ignorance of the law ug gross inefficiency si Tormis tungod sa daghang kaso nga wala niini madesisyoni nga milapas na sa reglamentary period.
Kahinumduman nga pipila ka tuig na ang nakalabay gisuspenso sa Supreme Court si Tormis, ang presiding judge sa Municipal Trial Court in Cities Branch 4 sa dakbayan sa Sugbo, sa tulo ka higayon tungod sa “abuse of authority, dishonesty and grave misconduct.â€
Hinuon lakip sa gi-dismiss sa SC mao si MTCC Branch 4 clerk of court Reynaldo Teves gumikan sa “simple neglect of duty.†Ang ilang silot naggumikan sa reklamo sa Office of the Court Administrator kansang audit team misusi sa kahimtang sa sala ni Tormis.
Gumikan niining ilang pagka-dismiss, gibaliwala sa Supreme Court ang ilang mga benefits ug privileges nga ilang madawat panahon sa ilang pagretiro. Kini isip silot sa ilang kalapasan.
Hinuon gipanghimakak sa duha ang giingong ilang kahiwian nga nakita sa Supreme Court. Wala gayud kuno sila nagpabaya sa ilang katungdanan ug nga grabe ra kuno ang silot nga gipahamtang kanila.
Apan basi sa ebidensiya nga nakuykoyan sa Supreme Court, klaro kaayo ang ilang pagpabaya sa ilang katungdanan. Kana kay na-dismiss sila sa ilang trabaho nagpamatuod lamang nga klarong adunay kalapasan nga ilang nahimo.
Hinaut nga seryoso usab ang liderato sa hudikatura paglimpiyo sa atong mga korte gikan sa mga badlongong huwes. Dili ikalimod nga daghan pang mga huwes tibuok nasud ang nagmika sa ilang pagpangatungdanan nga angay lamang silotan.
- Latest
