Saludo ko Sir!

Pagkanindot sa gihimo ni Atty. Aristotle “Totol” Batuhan kay karon nga nagsugod na ang kampanya sa mga kandidato sa lokal nga katungdanan iya dayon nga gipangtang-tang  ang mga dagko niya nga campaign posters.

 Mao kana ang gusto nako sa usa ka kandidato, kanang dili masinupakon sa balaod. Baya na man kanang ubang kandidato, wala pa gani makadaug maghinambog na. Ang uban dili motuman og balaud ug walay kukauwaw nga mag-drive og motorsiklo nga walay rehestro ug wala pa’y helmet.

Ikaduha, ang usa ka kandidato, “transparent” g’yud ngadto sa katawhan nga mipili kanila dili kay kun dunay gusto nga kuhaon nga inpormasyon sa mga sakop sa media dili motubag, unya masuko sa media, pastilan.

Ang gihimo ni Totol Batuhan kagahapon nakakuha sa akong pagdayeg og maayo unta kun sundon kini sa ubang politiko nga sila mismo ang mangunay sa pagtangtang sa dagku nila nga mga propaganda posters.

Ang tinuod, bisan unsaon ninyo pagdagku ang inyong mga campaign posters, dili kana makapausab sa hukom sa mga tawo nga kamo botohan atul sa eleksyon.

Usbon nako, saludo ko sa gihimo ni Totol kagahapon nga siya ang nangunay sa pagtangtang sa dagku niya nga campaign posters ug gisugdan niya didto sa Barangay Dulho-Fatima, ang giingong balwarte sa iyang kontra nga si Konsehal Bebot Abellanosa.

Ambot og tinuod ba nga gitangtang na ni Bebot ang mga dagku niya nga campaign posters kay matud niya una man kuno siya nga naghimo niini. Atong huwaton nga moawhag usab si Bebot og media coverage nga pangtangtangon niya ang iyang dagku nga posters.

* * *

Usahay, mapikal ko nga makadawat og report ilabi na kun maglambigit og illegal nga drugas. Ayaw kaayo kamo pagtinalawan nga magbalik-balik ang hangyo nga dili itug-an ang inyong kontak numbers.

Grabeha naman usab ninyo katalawan! Nakakita ba kamo nga gipublikar nako ang numero sa nagpadala nako og inpormasyon? Kun mao kana ang inyong batasan nga grabe katalawan, ayaw na lang pagpatuga-tuga paghatag nako og inpormasyon.

Ayaw usab kamo paglaum nga abi kay inyong gipadala ang reklamo dinhi sa atong lindog mahatagan na og sulbad ang inyong problema. Daghan kaayo nga problema nga atong gitagad. Ikaduha, dili man nato mapugos ang mga ligoy nga government enforcer, ang atong buhaton mao ra ang pag-expose sa ilang kaligoy.

Gipang-raid na bitaw ang uban nga gi-report diri sa atong lindog, apan dili mora’g sili nga mohalang dayon ang inyong reklamo, ilabi na og mga reklamo nga tungod sa katalawan daghan kaayong buslot, daghang kuwang!