Tungod sa gugma

Dunay pipila ka mga Amerikano nga nakagusto kaayo sa Pilipinas, lakip na sa Sugbo, kinsa nakahukom sa pagpuyo bisan pa sa kinabuhing makapasantos kay napuno og pag-antos.

* * *

Mipakita sa ilang dakong gugma sa atong nasud si John, Paul ug Joe (dili nila tinuod nga ngalan) kinsa nangaminyo og Pinay ug mimugna og kaugalingon nilang pamilya dinhi.

* * *

Nagkalisud-lisud ang mao nilang pamilya apan miunong sila sa matag nila ka banay. Si John, pananglitan, usa ka plamer (plumber) didto sa Amerika dugay nang way trabaho. Apan naningkamot mabuhi niini ang iyang Pinay nga asawa ug duha ka anak pinaagi sa pagbaligya’g utanon ug lagutmon nga iyang gitanum sa yuta sa ginikanan sa iyang Pinay nga asawa.

* * *

Si Paul kinsa usa ka window cleaner didto sa iyang dapit sa Amerika nagnegosyo og kan-anan nga pungko-pungko duol sa buwangan didto sa lungsod sa Pabrika, Negros Occ. Ug si Joe nanginabuhi isip mamaligyaay og siomai  nga iyang inangkat dinhi sa Sugbo. Si Joe adto nanimuyo uban sa iyang Pinay nga asawa ug usa ka anak sa Negros Or.

* * *

Duna sab kitay nadunggan nga usa ka Kano nga namaligya og ice candy diha sa Opon. Wa nato makuha ang ngalan niini.

* * *

Angay nga pahalipayan kining maong mga Kano gumikan sa ilang gipakitang gugma sa Pinas diin sila nipilit sa pagpuyo bisan sa kinabuhing naglisud-lisud.

* * *

(Kining atong lindog karong adlawa gibasi sa tinampo nga artikulo ni Rico Pilar, Mabini, Cebu City)