Pamalandong

Huwebes Santo karon busa atong gipaabot nga magdasok ug maghuot ang atong mga simbahan tungod sa pag-obserbar natong mga katoliko sa pagpasakit ug pagkabanhaw sa atong ginoo. Apan samtang daghan ang moadto sa simbahan alang sa pagtamod sa mga gimbuhaton isip katoliko daghan usab ang atoa karon sa kabaybayonan ug mga dapit bakasyonanan naglulinghayaw ug nagtagbaw. Manghinaut lang ko sa mga katoliko nga anaa karon sa mga dapit bakasyonanan ug lulinghayawan nga hatagan og gamay nga panahon ang pagpamalandong.

* * *

Gipalagpot sa Korte Suprema si MTC Judge Rosabella Tormis ug ang iyang clerk of court nga si Reynaldo Teves. Sa 17 ka pahina nga hukom sa Korte Suprema ang huwes gipalagpot tungod sa gross inefficiency ug gross ignorance of the law samtang ang clerk of court gipalagpot tungod sa duha ka kasong simple neglect of duty.

Sa sinugdanan, si Judge Tormis ug ang iyang Clerk of Court nga si Teves nagkinihaay ug nag isig reklamo ug ang ilang reklamo ilang gipaabot sa Korte Suprema. Kaniadtong Marso 12 ang Korte Suprema mipagawas og patas o koridas nga hukom, ang reklamante ug ang gireklamo gipangtang-tang sa ilang katungdanan ug gidid-an sa paghupot og maski unsa mang position sa gobyerno. Gawas niini, dili usab ipahatag sa pinakataas nga hukmanan sa Pilipinas ngadto ni Tormis ug Teves ang ilang mga benepisyo.

* * *

Gibuhian ra gayod sa mga sakop sa Abu Sayaff ang Australianong ilang gidagit apan ang pagbuhi may katumbas nga upat ka milyon ka pesos nga ransom. Ang pagbayad og ransom giangkon mismo sa asawa sa biktima kinsa namaligya sa ilang mga katigayonan aron matigum ang gipangayong upat ka milyon.

Si Pangulong Aquino nga gipangayoan og reaction mahitungod sa ransom miingon nga padayon ug nagpabilin gihapon ang no ransom policy sa gobyerno. We don’t negotiate with terrorists, matud pa sa pangulo. Tinuod dili makigsabot-sabot ang gobyerno ni Pangulong Aquino ngadto sa mga terorista kay mobayad ra man kini.  

* * *

Congratulations diay sa akong mga anak Jheremy ug Jay nga migraduwar sa ilang secondary education sa Southwestern University - South Campus kagahapong adlawa.