EDITORYAL - Ang paghatag og hustong serbisyo sa tawo

Ang  libreng  panlihuk-lihok  sa  katawhan  matag karon  ug  unya  maoy  giampingan  sa kagamhanan  nga  di mabalda aron makaapas kini  sa dagan  sa kinabuhi  ug  panginabuhi.

Ang  mga sakyanang  pampubliko  ug  ang  mga  agianang  pampubliko kanunay  nga  gibantayan  nga mahimong  kaabag  sa  katawhan  nga  nag-apas nga  makaabot  dayon  sa  ilang adtoan.

Kung  nag-eskuyla, naningkamot  kini  nga  dili  maulahi  sa klase,  ug susama  usab  niini  ang  mga  trabahante  nga  nag-apas  nga  di  maulahi  sa pagtambong  sa trabaho.

Sa katibuk-an  way  laing gihunahuna  sa  mga  tawo  nga  nagdumala  sa mga  pasilidad sa goberno  sa  pagserbisyo  sa publiko  kundi  maalagaran  ang  tanan  aron mapagaan  ang  ilang  panlihuk-lihok  ilabi  na  sa natad  sa panginabuhi  ug  edukasyon.

Apan  ngano  nga  adunay  mga   serbisyo   sa ubang  departamento sa  goberno   nga  kun    may trabahoon  sa  mga  karsada  maura  og  gusto  nila  nga  ang  katawhan  nga  ilang giserbisyohan  ilang  paantoson  ug  sakripisyohon.

Sama  sa  mga  karsada  nga  lungagan  alang  sa tubo  sa tubig  o kaha  kanal.

Nasayud  baya  ang kagamhanan   nga ang  lihok  sa tawo  uban  sa panginabuhi  ug  uban  pang  gimbuhaton  niini  anaa  sa panahon  sa adlaw.

Nganong  di man  kini  trabahoon  sa panahon  sa gabii  aron di mabalda  ang  lihok  sa katawhan  nga nag-apas  sa ilang  panginabuhi panahon  sa adlaw.

Unta usab  ang  mga  lokal  nga  opisyal  sama  sa  mga  opisyal  sa barangay  o  lungsod  diin  mahimutang  ang  mga  proyekto sa goberno  nga  modisturbo  sa panlihuklihok  sa katawhan, motabang  pagbadlong  sa  mga   opisyal  nga  gipiyalan  sa goberno  sa maong  mga  proyekto.

Kay  ang  mga  opisyal  nga ingon  niana,  matang  sa opisyal  nga  naghunahuna  sa pagsurambaw   sa kagamhanan  aron masuko  ang  katawhan  niini.

Busa   kun pasagdan  kini  sa  mga  lokal  nga  opisyal  sa barangay, lungsod  ug  siyudad,  maisip  nga   kakunsabo  ra  sila  sa mga  opisyal  nga  surambaw  nga  way  pagpakabana  sa paghatag  og  hustong  serbisyo sa katawhan. Kay  ang  mga  lokal  nga opisyal  mao  ra man  unta  ang  dali kaayong  makatabang  sa katawhan  sa pagbadlong  sa  mga opisyal  nga surambaw.