EDITORYAL - Ang mga tax evader ug ang mga otoridad

Hangtud  karon  daghan  lang  diay  gihapong  mga  tax evader  kon mga mamumuhis  nga  di mobayad  og  buhis.

Kasagaran  ra ba  niining  ginganlan  nga  mga  tax  evader  mga  dagkong  negosyante  ug  adunahan.

Daghan  mang  rason  nganong  ang  kuwartahan mahimo ra  nga  di  magtinarong  pagbayad  og  buhis,  ug  usa  niini  mao  ang  daghan  nilang kuwarta  nga  sayon  ra kaayong itingal  sa mga maniningil  og  buhis, kuwarta  nga mopapiyong  sa  mga  mata , mopatak-om  sa baba, ug  mosap-ong  sa dunggan  sa  taga  BIR  kon maniningil  og  buhis.

Di sab angay  kasinahan  ang  maong matang  sa  mga  tawo  sa  mga buotang  magbubuhis , nga makaingon  sila  nga alakansi  sila kay  nagtinarong  sila pagbayad  og  buhis tungod  kay  ang  tawong  tikasan ug kawatan  moumento  man  apan  gabaan  ra gihapon sa kaulahian.

Ang  mga  tax  evader , paryente  ra   sa  mga  smuggler nga  kun  di hikutahon  sa goberno , aw labing  moburot  sa ilang  kadatu nga way  buhis-buhis.

Sa Biblia may kasaysayan  sa magtiayong  si Ananias  ug Safera kinsa  wa magtarong  sa  paghatag  sa  buhis   sa  nahalin nilang  yuta  ngadto  sa  mga  Apostol kaniadto sa panahon  ni Cristo.

Dihang  gisita  sila  sa  mga Apostol bahin  sa ilang  pagka-tax evader  unang mikirig patay  si Ananias ug misunod  usab  si Safera bisan wa sila  pusila  ug  dunggaba.

Sa pagkakaron  wa nay  mga  Apostol  nga  sama  kaniadto sa panahon  ni  Cristo, kay  may  maniningil  og  buhis  karong  panahona  dali kaayong   butaan, amangon  ug  bungolon  sa  kuwarta  sa  tikasang  mamumuhis.

Mao  nga    kun  ang usa ka  magbubuhis    malampuson  kaayo  sa iyang  pagka-tax evader , sutaa  ang  suod  niining  opisyal  sa BIR  di ba  kuwartahan  usab kaayo.

Kun  gigukod  sa mga otoridad  ug sa  mga  vigilantes   ang  mga  nagpadagan  sa illegal  nga  sugal  ug  drugas, mas maayo  unta nga  pasiplatan  usab  nila  ang  mga tax evader basin  pa  makatabang  sila sa kagamhanan  sa pagpitol  niini gawas  kun  magpatakod  sila  sa taga  BIR  nga kakunsabo  sa tax evader.