Ang kahilom sa PDEA

Sunod-sunod ang mga dagkong operasyon nga gihimo sa kapolisan sa rehiyon ilabi na sa lalawigan ug dakbayan sa Sugbo batok sa ginadiling drugas. Apan samtang subsob ang gihimo sa kapolisan batok sa ginadiling drugas, wala ta makadungog sa Philippine Drug Enforcement Agency dinhi sa rehiyon kun unsa na ang ilang gihimo isip ahensiya sa gobyerno nga mao gayo’y gitahasan sa paglutos ug pagsulbad sa suliran sa ginadiling drugas.

Ngano kahang hilom man ang nahisgotang ahensiya? Gikapoyan na kaha sila sa ilang trabaho o gibusog na sa mga tigpayohotan og ginadiling drugas?

Ang ako kun tinuod ang gihonghong sa higala nakong duwende nga dunay mga sakop sa Philippine Drug Enforcement Agency dinhi sa rehiyon 7 nga nangadato na, basin mao ni ang hinungdan nga nahilom sila.

Gireklamo sa mga ginikanan ni aktres Heart Evangelista ang uyab niining senador nga si Chiz Escudero nga ilang gihulagway nga palahubog ug wala’y batasan. Ang reklamo gipubliko sa mga ginikanan sa artista human sila biyai sa ilang anak ug mikuyog sa uyab niining senador.

Sa iyang pagtunga sa publiko puwerting hilak sa artista dihang gihinabi sa programa sa HOT TV sa GMA-7 niadtong adlaw’ng Domingo. Sa programa gitubag sa artista ang wala pag-uyon sa iyang mga ginikanan ngadto sa iyang uyab nga senador. Gihimakak sa artista ang pasangil sa iyang mga ginikanan nga palahubog ug walay batasan si senador Chiz Escudero ug gipanalipdan ang nag-uros-uros niyang gugma sa senador. Ang artista miingon nga iya na lamang isalig sa Kahitas-an ang tanan. Lisod gyod ning gugma kay kun mao nay mopilit makabuang nga bisan ang imong mga ginikanan imo nalang biyaan.

Seguro gusto lang suwayan ug sination ni Heart Evangelista unsa ka lami ang gugma sa palahubog ug wala’y batasan.  

Wala pirmahi ni pangulong Noynoy Aquino ang balaudnon nga maghatag og kaseguroan sa patas nga pagtagad sa mga batakang katungod ug serbisyo sa gobiyerno alang niadtong mga Pinoy nga anaa mahimutang sa tumang kakabus.

Ang balaud nagladlad sa lima ka mga batakang katungod sama sa katungod sa pagkaon, trabaho, edukasyon, puy-anan, panglawas ug tambal. Ang pangulo wala mopirma sa balaud tungod kay iyang nakita nga objectionable ang atong mga demandable rights.

Sa wala niya pagpirma, naneguro lang ang pangulong Noynoy Aquino nga dili maligo ang iyang kagamhanan sa mga kasong ipasaka sa mga kabus tungod sa kapakyas niya sa paghatag sa ilang mga batakang panginahanglan.