Ang Santo Papa ug si Msgr. Dakay

Gikuninitan sa mga pagsaway si Monsignor Achilles Dakay tungod sa iyang pamahayag agi’g reaksiyon sa mga report sa media nga naghulagway sa bag-ong Santo Papa nga usa ka yano ug mapaubsanon nga pagkatawo.

Si Pope Francis gihulagway sa mga report sa media nga nagpuyo nga simple dihang siya nagsilbi pa isip Cardinal didto sa Buenos Aires sa Argentina. Matud sa report nga nagpuyo lang siya sa usa ka simple nga apartment, moluto sa iyang kaugalingon nga pagkaon ug mosakay og bus.

Ang ka mapaubsanon ug ka simple nga tawo sa Santo Papa iyang gipakita dihang gipili niya nga mosakay sa bus gikan sa Sistine Chapel paingon sa Vatican inay nga adto sa Pope mobile nga nagpaabot niya human sa conclave. 

Apan bisan pa sa gipakitang ehemplo sa kamapaubsanon sa Santo Papa, gidudahan ni Dakay ang report mahitungod sa iyang pagkatawo. Atol sa interview sa dyLA kaniya matud ni Dakay nga dili siya motuo nga ang Santo Papa mosakay og bus. Dili siya motuo nga ang Santo Papa maoy magluto sa iyang kaugalingon nga pagkaon.

Sumala pa niya nga mamahimong kamao kini moluto apan wala ni magpasabot nga siya maoy magluto alang sa iyang kaugalingon. Posible nga kamao mosakay og bus ang Santo Papa apan di siya motoo nga gihimo kini sa Santo Papa.

Dihang gipangutana si Dakay unsay iyang ikasulti sa ehemplo nga gihatag sa Santo Papa, daw sa misaka ang iyang tingog ug miingon nga dili husto nga silang mga opisyal sa simbahan pasakyon na lang pod og Ceres tungod kay nisakay og bus ang Santo Papa.

Mamahimo nga dunay punto si Dakay sa iyang giingon nga samtang makamao moluto ang Santo Papa apan wala ni nagpasabot nga siya maoy mangunay og luto sa iyang pagkaon. Sama nga mahimong kamao siyang mosakay og bus nga bus na lang kanunay ang iyang sakyan.

Apan ang pagkaarogante sa iyang tuno nga daw sa kalbaryo gyud alang niya ang pagpuyo nga yano maoy nakabati sa iyang gihimo. Dili ba ang “vow of poverty” usa man sa mga gipanumpaan sa mga pari?

Sa bagay kinsa man tinuoy ganahan mosakay og bus kun duna kay BMW? Labi pa og ang BMW nga imong gisakyan dili nimo hinagoan. Kwestiyonable pa gyud ang pagdaog niini sa raffle. Asa gud ka makakita og tigpasiugda sa raffle nga mao ra sab maoy midaog? Nahinumdom mo sa fund-raising sa Archdiocese atol sa canonization ni San Pedro Calungsod diin nag-raffle sila og kotse? Si Dakay maoy usa sa mga midaog sa premyo.

Ug ambot unsa ka tinuod negosyante nga insik pa gyud ang gipabayad sa buhis niini, dili pa igo gipakapinan pa kuno og mga accessories sa BMW nga ang insik gihapon maoy gipabayad. Way nahimo ang insik gawas sa pagbayad bisan sa hilom nagbagulbol.  

* * *

Sulod sa milabay’ng pipila ka adlaw nagbansiwag sa mga lokal nga tabloid sa Sugbo ang advertisement sa Abante Barangay Movement ni Manlalaban Aristotle Batuhan.

Wala man tuod mangampanya apan tataw nga gipunting sa maong advertisement ang kontra ni Batuhan nga si konsehal Bebot Abellanosa nga nabaniog sa iyang pagpahimulos sa pwesto aron makuha sa iyang tunghaan ang dakong pahat sa scholarship program sa dakbayan.

Ang advertisement nagkanayon; “Scholarship ireporma, palapdan. Kurakot ibasura”. Dunay sukaranan ang maong kampanya, apan hinaut dili lang kutob dinhi.

Mas labing maayo og atong masayran unsaon niya kini pagreporma ug unsaon pagpalapad ang programa taliwa sa limitado nga panudlanan sa gobyerno.

* * *

[email protected].