Mga hagit sa Simbahan

Karon nga bag-o na ang Santo Papa, sa ngalan ni Papa Francis, daghang mga imposibleng butang ang gisinggit gikan sa nagkalainlaing hugpong sa kalibutan.

Moingon ko nga imposible tungod gawas nga kataw-anan, kining mga gipangyangongo mga kalapasan sa pagtulon-an ug tradisyon sa Simbahang Katoliko.

Sukad pa kaniadto nga ang mga hugpong sa kababayen-an sa kalibutan nanawagan sa Simbahan nga buksan ang ganghaan niini alang sa mga pari nga babaye.

Aduna nay mga simbahang Kristohanon diin ang mga babaye gipang-ordinahan isip pari o obispo. Kini maoy nakapabukas sa halapad nga atake sa Simbahang Katoliko tungod sa pabilin niining pagka-konserbatibo, nga miabot sa pagtawag niining “boys’ club” tungod bisan ang lider (ang Santo Papa) ug ang mga Cardinal nga mopili niini lahos ngadto sa mga obispo ug mga pari, pulos mga lalaki.

Nagpasalamat lang ko nga wala matandog sa kalibutanong atake ang Vatican, gikan sa nangaging Santo Papa, lahos na ngadto sa mi-resign nga si Pope Emeritus Benedict XVI, ug nagpabilin kini sa tradisyon nga ang mga pari, obispo, cardinal ug Santo Papa pabilin nga mga lalaki.

Para nako, dili angay paminawon ang maong mga panawagan nga salikwaot ug taliwas sa pagtulon-an sa Simbahan.

Sa Bibliya, ang 12 ka disipolo ni Kristo pulos mga lalaki, samtang ang nakadawat sa grasya sa liturhiya ug eukaristiya nga hangtod karon atong gisaulog pinaagi sa Santos nga Misa, pulos mga lalaki.

Ang unang mga haligi sa Simbahan pinanguluhan ni San Pedro ug San Pablo pulos mga lalaki.

Unsa may rason nga himuong pari sa Katoliko nga Simbahan ang babaye?

Ang pagka-talagsaon sa Simbahang Katoliko maoy hinungdan nga nagpabilin kining lig-on. Dili hinuon nato malikayan nga adunay taga-gawas o bisan kadtong anaa sa sulod nga nanglantaw og negatibo (kay bisan kadtong taas na og pagtuo usahay mahisalaag pa, unsa na kaha kadtong wala na magtagad sa ilang pagtuo?).

Ug nagtuo sila nga ang pagka-konserbatibo sa Simbahang Katoliko maoy hinungdan unya sa pagkapukan niini. Dili kini mahitabo hangtod aduna pay mga tawo (sama nako) nga modupa sa pagdepensa niini.

* * *

Si Papa Francis mao si Cardinal Jorge Mario Bergoglio sa Buenos Aries ug siya’y Primate of Argentina, ang nasud diin ang presidente nga usa ka babaye, si Cristina Kirchner, nangulo sa pagpasar sa balaod sa gay marriage ug paggamit og kontraseptibo sa ilang nasud.

Si Bergoglio ug Kirchner nagkabangga sa ilang mga baruganan, apan sama sa pagkapilde sa Simbahan sa Pilipinas sa away batok sa Reproductive Health law, pilde usab ang Simbahan sa Argentina sa ilang kawsa batok sa balaod nga gisuportahan ni Kirchner.

Apan bisan sa pagkapukan, si Bergoglio gipili sa mga kaubanan niyang Cardinal nga maoy mangulo sa 1.2 bilyones nga gidaghanon sa mga magtutuo sa Simbahang Katoliko. Una siyang Santo Papa gawas sa Europa ug unang Amerikanhon (Latin American) nga Obispo sa Roma ug Prinsipe sa Simbahan.

Sa pagkatudlo ni Papa Francis, nanggawas dayon ang panawagan nga hangpon sa Simbahan ang gay marriage, ang dugay nang gikahinaman sa mga bayot nga mahitabo diha sa konserbatibo nga relihiyon sa tibuok kalibutan.

Apan taas akong pagtuo nga dili kini mahitabo. Pabilin ang baruganan sa mga Katoliko mismo nga kining pag-ila sa samang katungod diha sa mga bayot ug tomboy dili mapahaum sa moralidad, ang labing importanteng pagtulon-an nga maoy naghikot sa Kristohanong katilingban.

Laing gisinggit sa pipila ka sektor mao ang pag-ila sa katungod sa kababayen-an nga molaglag sa ilang gisabak (abortion) ug paggamit sa kontraseptibo.

Hesusmaryosep!

Pagka-buang na lang gyud sa Simbahan kun mokalawat niining labaw pa nga imoral nga buhat sa tawo.

Kanus-a man ma-justify ang buhat sa pagkutlo og kinabuhi?

Bisan sa pagtulon-an didto sa India ug China, aduna sila’y sekta nga dili sila mopatay og insikto sama sa ok-ok ug alohipan, tungod kay sama sa tawo, aduna sila’y kinabuhi. Unsa na kaha ang pagkutlo sa kinabuhing bag-ohay pang nagsugod sa tago-angkan sa usa ka inahan?

Kay kanus-a man nahimong “reproductive health” ang pag-inom og pills aron dili mosabak ang babaye?

Kay kanus-a man nahimong “rights of a woman” ang paglaglag sa iyang gisabak?

Kay kanus-a man nahimo kitang labaw pa sa Ginoo nga mahimo na natong pugngan ang pagbidlisiw sa usa ka kinabuhi diha sa tago-angkan sa usa ka babaye human sa pagpalami nga wala hunahunaa ang responsibilidad sa mahimong epekto niini?

Kay kanus-a man kita makahunahuna nga mas mapakita sa kalalakihan ang pagpangga sa babaye pinaagi sa pag-amoma sa asawa ug mga anak ug ang paghulma og tibuok nga pamilya?

Kay kanus-a man kita makatugkad nga ang hinungdan sa ka-pordoy sa nasud dili ang pagtubo sa populasyon, kun dili tungod sa kataspokan sa tawo ug ang pagkakawatan sa mga tawo sa gobyerno?