Hinumdom

3. Kanunay’ng bug-at ang disposition sa matag usa. Sa sunod gula atong hisgutan ang mga detalyadong timailhan sa usa ka haunted house nga gilatid sa mga tawong nagtuon sa paranormal phenomena. 

3.3. Mga Timailhan sa Haunted House [4]

Ang mga Spiritual Researchers ang nihatag kanato ning mosunod nga mga lista sa mga timailhan:

1. DILI MASABOT NGA MGA KASIKAS/KASABA: Nga mahimong maglangkob sa mga tunob, panuktok, pangabli sa mga pultahan, cabinet ug uban pa.

2. MAABLI ANG MGA PULTAHAN SA ILANG KAUGALINGON — Dili dayon kini maalinggatan sa kadaghanan. Bugtong ang mga nakasinati lamang niini ang makamatngon. Bisan pa man kun natino sa nakasinati niini nga iyang gisirad-an ang pultahan sa dayon niyang lakaw apan pagbalik niya abli na kini bisan pa man kun ang nakasinati nagbinugtong lang sa maong balay.

3. MOSIGA UG MOPALONG ANG SUGA SA ILANG KAUGALINGON —  Ang nakasinati ning hitaboa ang nakatino gyud nga iyang gipalong ang suga apan sa pagbalik niya kini nisiga. Gipasiga niya ang suga apan sa pagbalik niya kini napalong na. Kining hitaboa ang mahimong mahitabo usab ngadto sa mga telebisyon, radyo ug uban pang mga kahimanang elektrikal.

4. MAWALA UG MAKIT-ANG MGA BUTANG — Gitawag kini sa mga Psychics og “DOPler Effect” (Disappearing Object Phenomenon). Gitawag usab kini nato og mga manghulamay. Kini naglangkob sa asporting diin mawala ang usa ka butang apan dili na gyud hikit-an pa ug sa teleporting diin nawala ang usa ka butang apan kini hikit-an sa laing dapit sa balay.

5. MGA ANINO – Masigpatan ang mga naglutaw-lutaw nga mga anino diha sa balay. Kining maong mga anino ang walay tinong porma ug bayhon.

6. DILI KASARANGANG LIHOK SA MGA HAYOP — Ang usa ka iro mahimong mouwang ug mopaghot sa walay igong hinungdan. Mopaghot siya sa usa ka direksiyon nga walay tawong nakita. Ang iring sa laing bahin ang mohimo og usa ka pagsud-ong sa usa ka dapit sa panimalay. Ang mga researchers ug gani ang mga exorcists mituo man nga ang mga hayop sama sa iro ang dunay hataas nga psychic ability nga nahimong abli sa kalibutan sa Espiritu kun itandi kanatong mga tawo. Mao nga sa mga imbestigasyon sa dili pa himoon ang usa ka deliverance session mao ang paggamit sa iro aron pagsuta sa usa ka dapit.

7. PAMATI NIMO GITAN-AW KA — Sa imong pag-inusara sa usa ka dapit, pamati nimo duna kay kauban nga dili Makita nga misud-ong kanimo. Dunay mga mga mata nagtutok kanimo.

8. DILI MATUGKAD NGA HINUNGDAN SA PAGSAKIT-SAKIT/KAGUBOT DIHA SA PANIMALAY – Diin lisud sutaon ang hinungdan kun nganong ang bisan kinsang makapuyo sa usa ka balay ang masakit man gyud ug mamatay. Nga sa ato pa, magsunod gyud ang kamatay. O dunay misugilon kanako nga usa ka Ginang nga ang ilang pamilya maoy ikatulong pamilya nga niabang sa maong apartment. Ang duruha ka mga asawa nga nag-una kaniya’g puyo didto ang managsamang “Nangabit” nga niresulta sa kaungkagan ug panag-away sa pamilya. Hinuon, bugtong siya ra pud ang nakahunahuna nga himoon ang pagbendisyon niadtong balaya.

9.  MGA KAHADLOKANG MARKA SA BUNGBONG  — Kasagaran mga kinawrasan kini nga mohulma og mga kahadlokang imahen kun marka. Dili matino kun kinsa ang nihimo niini.

Kini lamang ang pipila sa mga timailhan nga angayan nimong sutaon ug tun-an sa dili ka pa mohukom nga imong balay o pinuy-anan usa ka haunted house.