Helmet gyud

Pagkadungog nako sa balita sa DYLA nga polis namatay kay naaksidente samtang nagsakay sa iyang motorsiklo didto sa Borbon, gusto dayon ko nga masayod kun ang polis nagsul-ob ba og crash helmet. Ang tubag wala. Kusug pa g’yud nga mipadagan sa motor, sa ato pa gipangita sa polis nga siya madali pagkamatay. Leksyon kini sa ubang polis o mga tawo nga gahi’g ulo, dili mag-helmet kay nagsalig nga sila polis.

* * *

Nasuko si Koronel Eddie Benigay, ang direktor sa PNP Criminal Investigation and Detection Group (CIDG)-7, kay sukad sa paglingkod niya sa katungdanan wala siya mahinumdom nga nakahimo’g kampanya ang iyang mga sakop og illegal masiao operations.     

Akong gipahibalo si Benigay, kinsa higala nako dihang “Captain” pa ang iyang ranggo, sa nagpadayong illegal nga kalihukan sa usa ka operator og masiao nga taga Pasil. Usa ka usher ni “RB” (dili Rene Borromeo ha) anaa sa Manalili Street.

Sagdi lang, mahimoan na kini og operation sa dili madugay kay nahibaw-an nako sa laing police unit nga gipanid-an na diay nila ang illegal nga kalihukan ni RB.

* * *

Ari ta sa mga reklamo nga akong nadawat, dili hinuon ni mahurot, ang uban ugma na ‘sab. Sa Poblacion, Toledo dapit sa Boulevard bantang kaayo ang pagpamaligya sa shabu, agian lang kuno’s mga polis.

May sakyanan sa kagamhanan (SJV 996) nakit-an nga naghatud og tinun-an sa USC kaniadtong Marso 11. Sigi lang, tan-awa kun magpirmi ba.

Salamat kay mihunong na kuno paghatud og bata sa usa ka Learning Center diha sa V. Rama nga giisyu sa kapitan sa Kalubihan. Salamat kaayo Capt kun mao na.

Dunay nabalaka nga ang nadakpan nga suspetsadong druglord si “Dacs” kay basin kuno og mabuhian ra ‘sab. Tabang mo’g bantay.

May mireklamo sa mga polis sa Carcar kay sigi lang kuno’g panakop og mga drug pusher apan wala g’yud makahimo og pagpanakop sa mga druglord.

Nakadawat ‘sab ko’g reklamo kay ang kapitan kuno sa Buanoy, Balamban nag-operate og bar nga saba kaayo matag Biyernes ug Sabado nga molungtad sa kaadlawon, daghan kuno ang dili makatulog.

Sa Plaza, Carmen pwerteng ngit-ngita kuno sa gabii. Dunay misugyot nga himoan og kinalit nga drugtest ang mga drayber sa tricycle sa Mandaue kay nagtoo sila nga daghan kanila mga adik, kusog mopadagan nga pinasagad.

Duna kuno’y duha ka tanod sa Luyang, Carmen nga dili na magsilbi, dili gani makamao mo-blotter labaw na nga dili na makahimo pagpatrolya. Bitaw, nganong gipabilin pa man ni?

Gireklamo ‘sab ang mga standby diha sa eskena Marpa sa Mandaue nga magsigi og pangilkil sa mga PUJ drayber. Palihug mga polis aksyoni ninyo ni. Ugma na ‘sab ha?

Text lang sa 0933-570-0853.