ARTIKULO: Kinahanglan bang mohatag og 10% tithes sa simbahan?

Ginaingon nga kutob sa unsay blessings o grasya nga madawat ta dinhi sa kalibotan, kinahanglan nga kaantigo ang tawo mohatag og 10% niini nga bahin ngadto sa Ginoo, o sa iyang simbahan. Kini tungod kay siya man ang naghatag natong tanan og puhonan: ma salapi man o kabaskog sa atong panglawas.

Dihang di na ta makapadayo’g eskuyla sa kolehiyo tungod kay pobre atong mga ginikanan ug wala nay ikalahutay sa paggasto, puwerting luhod nato ug nag-ampo nga unta tabangan ta Niya nga ang gidamgo tang bituon, makab-ot! Dihang ice water lang ang atong gitinda, nag-ampo ta nga unta padak-on Niya ang atong negosyo. Dihang namunit ta’g mga buak nga botelya sulod ug gawas sa basurahan aron may ikapalit og pandesal, nag-ampo ta nga unta Iya tang haw-ason sa kalisod. Ug ang tanan natong gipamarayeg Kaniya, gihatag!

Apan dihang mansiyon na ang atong gipuy-an ug naghigda sa naglaundok nga salapi ug bahandi, unsa bay atong gibuhat? Namahin ba kita sa Ginoo? Nanghatag ba kita sa mga kabos ug sa atong isig ka tawo nga nanginahanglan, kinsa maoy gipasabot sa Magbubuhat nga mao ang iyang simbahan nga angay’ng bahinan og 10% sa blessings nga atong nadawat gikan Kaniya?

Hapit na usab ang eleksiyon sa tibuok Pilipinas. Mobaha ang tinumping salapi sa mga politiko samtang ang kinabag-ang duot sa mga timawang botante nagnganga ang baba sa tumang kagutom. Gituyo nila’g nganga ilang baba sa pamasin nga mapiksan og diyotay’ng kaluoy sa mga adunahang magpapili. Apan subo kaayong hunahunaon, nga dili tanan kanila ang makatilaw. Kay ang bungdo sa kuwarta nga gipagawas sa mga politiko, dili man para ipanghatag; kun dili, para ipalit og mga botos.

Luoy ang tikling ug bulingit nga mga menor de edad. Sila nahisama ni Lazarus nga igo na lang intawon sa pagpaantaw — nagpaabot nga adunay momho nga mahulog sa salog. Apan mas luoy ang mga datong linalang, kinsa di kaantigong mogahin og 10% tithes ngadto sa ilang isig ka ingon nga gipang-uhaw ug gipanggutom. Sanglit, pag-abot unya sa adlaw sa paghukom, ang nagpabuhong sa kalibotanong kalipay mahisugba sa kalayo nga wala’y pagkapalong, samtang ang nagpas-an sa mabug-at nga krus, makaangkon sa himayang dayon.

Karon mangutana kining tagsulat: “Kinahanglan bang mohatag og 10% tithes sa simbahan, o dili?” My dear avid readers, anaa ra gyud ninyo ang paghukom!