Mga environmentalist nga tinabonan ang mata?

Ang grupong nagpaila sa ilang kaugalingon nga mga environmentalist sa Metro Cebu nagpahibalo sa ilang pagpasaka og kaso batok sa kagamhanan sa dakbayan sa Sugbo tungod sa padayong pagbaliwala ug paglapas niini sa environmental laws.

Sa ilang pahibalo giingon sa mga nagpailang environmentalist nga dili na nila tugotan ang kagamhanan sa dakbayan sa Sugbo nga molapas pa sa Akta Republika Numero 9003 o Ecological Solid Waste Management Act of 2000.

Ang pahibalo sa pagpasaka og kaso gipirmahan kini sa pito ka mga tawo ug apil na niini sila si Atty. Gloria Estenzo - Ramos sa Philippine Earth Justice Center ug Aaron Pedrosa Jr. sa Freedom from Debt Coalition.

Sa pahibalong ilang gipadala ngadto kang Mayor Mike Rama ug sa City Solid Waste Managemernt Board ilang giingon nga naalarma na sila sa pagka way kabangkaagan, kakuwang sa lakang nga gihimo ug dili epektibo nga pagpatuman sa Ecological Solid Waste Management Act of 2000 kini tungod kay padayon gihapong makit-an sa kadalanan ang mga nagpasad nga nagkalain-laing basura sama sa mga plastik ug uban pa.

Gawas sa paglapas sa Ecological Solid Waste Management Act of 2000 gilapas usab sa kagamhanan sa dakbayan sa Sugbo ang Akta Republika Numero 9275 o Clean Water Act of 2004 tungod kay ang hugaw nga gikan sa mga kasilyas padayon pa kining gilabay sa mga agianan sa tubig tungod kay ang dakbayan wala gihapon kini mga sewage treatment facility.

Samtang akong gisuportahan ang mga kalihokan nga nanalipod sa kalikopan ug kinaiyahan sama sa gihimo ning mga nagpailang environmentalist pero dili upod nako mapadaplin ang pagpangutana sa tinuoray nga motibo ning mga tawhana tungod sa pagpili lamang nila sa ilang mga pangpasakaan og kaso.

Nagpaila silang mga environmentalist sa Metro Cebu ug kun maghisgot ta og Metro Cebu kun wala ko masayop gikan kana sa dakbayan sa Carcar sa South nga bahin sa Lalawigan sa Sugbo paingon na sa dakbayan sa Danao sa Norte.

Karon mangutana ko sa mga nagpailang environmentalist sa Metro Cebu, sa mga lungsod ug dakbayan nga nahasulod sa Metro Cebu diin kamo nagpakabana, sa kadaghan nila ang dakbayan sa Sugbo ra gayod ang wala makapanghipos sa nagkalain-lain nilang basura nga nagpasad sa kadalanan sama sa mga plastik, ang dakbayan sa Sugbo ra ba gayod ang walay sewage treatment facility? Kun ang ilang tubag affirmative, peligro kun magdaghan ang ilang grupo kay tinabonan ang ilang mga mata.