Mag-BOPK diay unta

Gibutyag ni Kongresista Tomas R. Osmeña nga si Atty. Raymond Garcia nga maoy presidente sa Kugi Uswag Sugbo (KUSUG) nagtinguha diay unta nga molansar sa pagka konsehal sa dakbayan ubos sa landong sa Bando Osmeña Pundok-Kauswagan (BOPK).

Wala kini ipanghimakak sa anak ni kanhi mayor Alvin Garcia apan gitataw niya nga dili siya maoy naninguha nga masulod sa BOPK, kun dili si Jonah John Rodriguez nga kanhi secretary sa iyang mama.

Giangkon ni Raymond nga nagkita gani g’yud silang tulo si Nanette Garong nga radio program handler ni Tommy, ni Jonah John didto sa ilang karaan nga balay diha sa Juana Osmeña Street kaniadtong Septembre.

Buyno, samtang nanghimakak si Raymond nga siya ang naninguha nga makalansar pagka konsehal ubos sa BOPK, apan wala siya mohimakak nga kun giapil pa siya sa han-ay sa mga kandidato sa BOPK, dili niya kini balibaran.

Ang nakadaut kang Raymond mao ra g’yud si Jonah John. Unsaon nga pwerte man g’yud nga sukoa ni Tommy aning Jonah John kay mao man kini ang mibugal-bugal ni Konsehal Margot Osmeña kaniadto.

Nakonbikto man gani si Jonah John sa korte sa kaso nga gipasaka ni Konsehal Margot. Grabe ‘gyud hinoon kaayo ang gihimo ni Jonah John kay tiaw mo gihinganlan niya og “burikat” si Margot.

Gibutyag ni Tommy ang inpormasyon nga si Raymond buot diay unta nga molansar pagka konsehal ubos sa BOPK kay mao kini ang posible nga rason nga walay taga BOPK nga giendorso sa grupo’ng KUSUG.

Apan matud ni Tommy nga ang mga kandidato sa BOPK wala usab magpaabot nga ituboy sa KUSUG kinsa gihulagway niya nga wala na’y mga dumadapig sa pagka karon.

* * *

Dunay mga text message nga akong nadawat ug nangutana nganong wala sila makabasa og tubag gikan ni Konsehal Rodrigo “Bebot” Abellanosa nga gipasakaan og kaso sa iyang kaatbang nga si Atty. Aristotle “Totol” Batuhan.

Kaniadto pa ko’ng Martes nga nagsigi og text ni Konsehal Abellanosa ug mihangyo nga hatagan ko niya’g kopya sa iyang tubag didto sa Malacañang apan wala g’yud motubag.

Kagahapon ako na usab nga giteksan si Konsehal Abellanosa ug gipangutana nganong wala na siya motubag nako. Sa kataposan, mitubag ra g’yud tawon. Ang iyang tubag mao nga dili kuno niya hatagan og higayon nga magamit ni Totol sa propaganda ang iyang tubag.

Buyno, respitohan nako ang iyang tubag. Apan isip sakop sa media, mas labing maayo g’yud nga mapublikar unta ‘sab ang tubag ni Konsehal Abellanosa kay nabalita gud ang pagpasaka kaniya’g kaso.