Kinsa ning sakyanan?

Kinsa ba ang giisyuhan sa Cebu City Hall niining Toyota Hilux nga ang plate numbers SKV 459?

Nakadawat man gud ko og report, kadaghan na, nga makit-an kining mao nga sakyanan nga maghatud og tinun-an diha sa Childlink Learning Center sa Sodiacville, Happy Valley sa V. Rama.

Sagdi lang kay ang akong inpormer misaad nga kuhaan niya’g hulagway ang maong sakyanan kanang iatul nga mokanaug na ang bata. Daan pa lagi ko, gamit-gamiton ra ning mga sakyanan sa pangabuso.

Didto sa usa ka tunghaan sa Talamban, susama nga Toyota Hilux nga gray, ang plate number SKV 526 makit-an ‘sab nga maghatud og bata.

Awhagon  nako si Mayor Michael Rama nga putla na tawon ang pagpangabuso sa imong mga sakop uy. Karong adlawa, susihon nako  kang GSO Chief Rolly Ardoza kun kang kinsa kini maisyu ang maong mga sakyanan.

Nagpasalamat ko sa mga inpormer nga mopahibalo nako aron nga mahimoan og imbistigasyon. Unya kamong mga hingtungdan, ayaw kataha pagtubag nganong nagamit ang inyong service vehicle sa paghatud-kuha sa bata.

* * *

Uy, may report nga akong nadawat, magsigi lang kuno’g katulog ang mga polis nga nadistino sa presento sa Opao. Sa Mandaue tingali ni no? Palihug mga polis diha undanga na ninyo ang pagkahingatulgon kay magkaproblema unya mo.

Diha sa Sitio Ingles-Riverside misiaw ang pagpangisyu’g masyaw diha. Duna gani 13-anyos nga aser kon tigbaligya sa numero. May mireklamo ‘sab sa mga bata nga wala matagad sa ilang ginikanan diha sa Pier 3, mangayo ug kun makalugar, mangawat.

Atensyon VECO, may katumbahon nga electric post diha sa Sitio Cadahoan, Talamban. Post  No. V017776254.

* * *

Daghan kaayo ko og report nga nadawat nga mireklamo sa pagsiaw karon sa mga tigpasiugda sa sugal nga masyaw ingon man sa drugas.

Apan kun akong pangutan-on sa ngalan dili mohatag sa ngalan. Maayo man gud unta kadto kun may ngalan kay madali ra sa mga polis ang paghimo’g operasyon.

Ang sunod nga problema mao kun tinud-on ba gayud sa atong mga polis nga dakpon g’yud. Sama diha sa Lutopan, Toledo nahibulong ang mga tawo kay kun madakpan, mabuhian man dayon inigkaugma.

Sa kadaghan sa reklamo, ang uban dili na nako matagad gawas niadtong importante g’yud kaayo, apan ako kini nga gitipigan.