Ang drugas ug politika

Duol na gayod ang piniliay. Busa nagkadako na ang panginahanglan sa mga kandidato sa salapi nga magasto sa ilang kampanya. Sa Pilipinas, sayod na ta, salapi ang pinakagamhanan nga hinagiban sa pagpapili ug pagkuha og katungdanan.

Tungod sa dakong panginahanglan sa salapi ang mga tigpayuhot og ginadiling drugas mosalida na usab sa ilang pagkamatinabangon ngadto sa mga politiko ug kandidato sa tumong ug tuyo nga human sa ilang kadaugan maseguro na ang proteksyon sa negosyong illegal. Dinhi nahimong epektibo ang Narcopolitics diin ang salapi nga gikan sa ginadiling drugas nakatabang sa pagpili og kandidato o politiko.

Busa gikinahanglan nga mausisahon ang mga botante sa pagpili sa mga kandidato kay basin og makapadaog kini og kandidatong hiniktan ang liog sa mga drug lords.

Ang katawhan nga botante gikinahanglan nga magpakabana kun gusto pa niining malikay ang ugma sa gusto niining mopatay. Angayang hinumduman sa tanang nagpakabana ug niadtong wala pa nga ang sindikato sa ginadiling drugas mikuyanap na pagmaayo sa atong katilingban busa hugot gayod unta kining pakigbatokan sa katawhan.

Ang sindikato sa ginadiling drugas nakasulod na sa polis, mga tigtaral, mga maghuhukom ug mga nagpadagan sa kagamhanan busa ang nahisgotang suliran dili na nato masalig ngadto kanila. Panahon nang gamiton sa katawhan ang iyang gahom. Sa nagsingabot nga piniliay kinahanglang irehistro na sa katawhan ang hugot niyang pagsupak sa paghatag og gahom niadtong mga politiko o kandidato nga suportado sa mga tigpayuhotan og ginadiling drugas.

* * *

Ako diay nga pahalipayan ang NEWGAD o New Generation Against Drugs and Corruption, Inc. tungod sa pagkapili niining Most Outstanding Student Organization sa Southwestern University sa gipahigayon niining recognition rites kaniadtong miaging Biyernes.

Sa mga opisyales sa student organization nga NEWGAD nga gipangulohan sa ilang presidente Leo E. Bono ug mga sakop, CONGRATULATIONS. Ipadayon ninyo ang pagsabwag sa ebanghelyo sa NEWGAD.