EDITORYAL - Bisan kinsa makadakop sa molapas sa Comelec rule

Tin-aw  kaayo  ang mando sa Comelec  nga bisan  kinsa makahimo  sa pagdakop  sa  mga  malapason  sa balaod   pinaagi  sa people’s arrest, sama  pananglit  sa mamitay  ug  mopapilit  og   tarpaulin, poster  ug  uban  pang  material  propaganda  sa kandidato  sa  mga  lugar  nga way labot  sa common  poster  area  sa  matag  syudad, lungsod  ug  barangay.

Apan kinsa  bay  makaako  niini  sa pagpanakop?  Kun  aduna  man, may  nakadakop  na  ba  og  tawo  nga  namitay  og  mga  propaganda  material  sa dapit  nga  gawas  sa  gitugot  sa Comelec?

Kun  aduna  na, mas labing  maayo  ilabi  na  kun gipahamtangan  kini  og  silot sa Comelec.

Makaluluoy  baya  kaayo  ang  mga  lugar  kansang  mga  pader, poste  ug  bisan  bongbong  sa  mga  balay  gipapitlan  og  mga propaganda  material sa  mga  kandidato.

Kini  tungod  kay  di man  unta  angay  mahitabo gumikan  sa balaod  nga  gipatuman  sa Comelec  batok  sa pagpatuyang  pagpanaod  og  mga  campaign  material  ning  nagsingabot  na  nga  piniliay.

Apan  kasagaran  sa maong  mga balaod  giingon  sa mga tigpaniid  nga “for your eyes only”  kay  way  tango  nga  mohambat  sa  malapason.

Tingale  sa ubang  mga  balaod  sama  sa  Comelec  gun ban, tungod kay  mga  polis  ang kaabag  sa maong  kampanya, aw sigurado  gyud  nga  kagulkol  sa  prisohan  ang  makalapas  niini.

Apan bahin  sa  mga  campaign material,  wa  pa gani  mapapas ug malaksi  ang  daghan  kaayong  mga  poster sa ubang  mga  lugar  nga  namilit  sa mga pader ug mga poster  sukad  sa tuig 2010  nga eleksyon,  gisapawan  na  usab  karon  og  mga  bag-ong  dagway sa  mga  kandidato  ang  maong  mga  materyales.

Kini tungod  kay  nahimo na kining  bisyo  sa katawhan  nga sinugo  sa  mga kandidato  matag  maghinangat  ang piniliay.

Total naa  may  daghang  kwarta  sa goberno  nga  magamit  sa pagsuhol  sa  mga  manglaksi  ug  manangtang  niini  human sa piniliay  aron  sa paghawan  sa  mga  pader, poste  ug  mga  bongbong  sa  mga edipisyo  ug  kabalayan  ning dakbayan  nga  gipapitlan  sa maong  mga  butang.

Apan  komusta  ang taga  Comelec, makasukmat  ba  sila ug makatulisok  sa  mga  politiko  nga maoy nagpasiugda  sa pagbuling-buling  ug  paghugaw-hugaw  pinaagi  sa  ilang  mga  dagway nga  gipapilit  sa mga  lugar  nga  gidili  sa balaod?