EDITORYAL - Ang kabtangan sa Pinoy nga giilog sa langyaw

Ang Sabah dugay na nga nabaniog  nga  iya  sa Pilipinas apan tungod  kay abunda kini  sa asayte  nga  mokantidad  og P18 ngadto sa P20 bilyones matag  tuig, lunod  patay  nga  giyak-an  sa kagamhanan sa Malaysia  ug andam nilang  buhisan  og  kinabuhi  kun  suwayan  pagbawi sa nanag-iya  niini. Nahitabo  na  ang  gikabalak-an sa kagamhanan sa Pilipinas karong  misuway  si Jamalul Kiram III  ang Sultan sa Sulu  sa pagbawi  sa Sabah.

Ang  kaagresibo  sa mga   puwersa  seguridad  sa Malaysia  ug  ang  katalaw  nga  gipakita  sa kagamhanan  sa nasud  sa  Pilipinas sa pagdepensa  kang  Kiram, labing  nakapaisog  sa kagamhanan  sa Malaysia  nga sama  sa irong  buang  nga  lunod patay  ug  wa nay  kahadlokan  pagpanalipod  sa Sabah  nga  di mabawi sa tinuod  nga tag-iya  niini.

Sa laktud  way kaikag  ang  kagamhanan sa Pilipinas  sa pagbawi sa Sabah  tungod  tingale  kay  wa  usab  kini  interes  sa  abunda  nga tinubdan  sa asayte  sa maong   isla  nga sarang untang  makatabang  paghaw-as  sa daghan  kaayong  kabus  nga  mga Filipino  kinsa  nag-ilaid  sa  kalisud  sa panginabuhi.

Kun  makita  kini  sa China  kinsa  sama  sa  usa  ka lion  nga  nagtinguha  nga  muhambat   ug muilog  sa  mga  isla  sa Spratly  gikan  sa Pilipinas, di kaha  musamot  ang  ilang  kaisug  pag-ilog  sa maong  mga  kabtangan kay  nasud-ong man nila  nga  mibahag  ang ikog  sa Pinoy  pagdepensa  niini  sa Sabah?

Dinhi  makita  sa mga  Pilipino  nga  kuwang sa kadasig  ang  kagamhanan  sa nasud  sa  pagpakig-asdang  batok  sa  mga  puwersa  sa  mga nasud  nga  buot  muilog sa atong  mga  butang.

Tungod  kay  di kahadlokan  sa  mga  taga langyaw  ang  kakalma  sa taras  sa  mga  Filipino  bisan  kun  tataw  na kaayong  giyatakan ang katungod  niini  sa ubang nasud, may posibilidad  nga  di  na magpanuko  ang  mga  langyaw  sa pagpanaugdaog  sa  mga  Filipino. Sama  sa nahitabo  sa unang  mga  panahon,  nga  human  muhari  ang  mga  Katsila  dinhi  sa nasud sud  sa daghang  mga  tuig, mipuli  ang  mga  Hapon  ug maayo  na lang  kay  mitungha ang  maayong  higalang nasud  nga  Amerika  nga  maoy  mitabang  pagpanalipod  sa Pilipinas  batok  madaugdaugon  nga  mga  Hapon.  

Karon  anaa  pa gihapon  ang  America apan  tungod  kay  sigihan kini og sunggaw  sa  mga  rebelding  komunista, wa kahay  purohan  nga  moislag  kini  ug  mobiya  na  sa hingpit sa iyang  pagpakigsuod  sa mga Filipino?