Politika maoy giuna

Samtang nagkakusog ang kampanya sa piniliay karong Mayo, nagkainit na usab ang dagan sa politika sa nasud. Nag-iyahay nag tadlas ang mga kandidato sa nasyonal nga posisyon sa mga lalawigan.

Ang duha ka dakong grupo nga nanagtigi karon, ang Team PNoy ni Presidente Benigno Aquino III ug ang United Nationalist Coalition ni Bise Presidente Jejomar Binay, mibulhot na pagsuhid sa kalungsoran. Kini aron paghakot og suporta aron pagsiguro sa ilang kadaugan sa eleksiyon.

Sa mga pagbisita sa mga probinsiya, nag-una gayud si Presidente Aquino pagkampanya alang sa iyang grupo. Ug sa iyang pagdiskurso, grabe siya makaatake sa iyang mga kontra sa politika. Gani dili gayud kalimtan sa presidente ang pagpahit sa mga kontra sa iyang mga kaalyado alang sa lokal nga mga posisyon.

Daghan na hinuon ang nadismaya niini. Ang uban mikwestiyon na hinuon kun unsa gayud ang tinuod nga motibo ni Aquino. Angay ba gyud siyang mangunay pagkampanya alang sa iyang mga kapartido?

Mora’g nataligam-an na hinuon ni Presidente Aquino ang una niyang obligasyon, nga mao pag-atiman og una sa katawhan isip amahan sa nasud. Pamulitika na hinuon maoy iyang giatubang.

Unsa kaha kun adunay mobutong katalagman samtang ang presidente kamulog batikos sa iyang mga kontra sa politika atol sa kampanya? Dako gyud kana nga problema, tungod kay ang politika maoy giuna. 

Dili na man siguro kinahanglan pang mismo ni Presidente Aquino maoy mangunay og kampanya alang sa iyang mga kandidato. Adunay igong resources ang presidente nga iyang magamit alang sa suporta sa iyang kaalyado sa politika nga dili na siya mismo pa ang mokuyog atol sa mga kampanya.

Hinuon dili gayud ikalimod nga nagtangag og dakong obligasyon ang opisina nga gikuptan sa presidente kay sa iyang mga diskurso batok sa iyang mga kontra sa politika atol sa ilang mga  kampanya.   

Sa akong pagtan-aw karon, mas dako pang importansiya ang gihatag ni Presidente Aquino sa iyang kaanib sa politika kay sa dakong trabaho nga naghuwat sa iyang buhatan sa Malacanang.