EDITORYAL - Ang terminolohiya nga brown out sa Pinoy

Kitang  mga  Filipino  bisan  nasayud  ta  nga  sayop  ang  terminolohiya  nga brown  out  ganahan  gyud  kaayo  ta   mogamit niini  tungod  kay  murag di ta motuo  nga  sayop.

Matag  kapaslok  sa atong  suga, ang mabasa  nato  sa  mga pamantalaan  ug  mga  sibya  sa radio  mao  ang  brown out.

Ang tinuod  gyud  unta  nga  kahulogan  sa  brown  out mao  ang  kakuwang  og  boltahe  sa  kuryente  sa usa  ka  lugar  diin  ang  imong  bombilya  nga  puti,  ug  hayag  og  siga  kun  husto  ang  boltahe,  mahimong  brown  ang  siga  tungod  kay  kuwang  sa supply  ang  boltahe, kana  bang  mura na  og  kapaslokon apan  di  gyud  mapawong  kay  may  hinay  mang  kuryente  nga  nagpasiga  niini.

Mao kana  ang  brown out, nga panagsa  ra baya  kini  mahitabo kanato  kay  ang  kanunay nga  masaksihan sa tanan  mao  man  ang  black out  o  hingpit  nga  pagkamatay sa   kuryente busa  pawong  ang  tanang  mga  suga.

Mao  nga  bisan  unsay  hinungdan  sa  pagkamatay  sa kuryente, mahimong  tungod  sa bagyo, sunog, kilat  o  liti,  tabanog, ug uban  pa, ang angay  gyud  nga  itawag  niana  black out  gyud  kun  inenglison man ugaling  nato  ang  tawag  niini  ug  di  tawon  brown out  oi.

Mao  usahay  nga  magkatawa  ta  kanatong  mga Filipino  kay  naanad  na  kaayo  nga  moestorya  og burit, unya  madugay  basta  wa gyuy  mosupak  sa maong  bakak,  himuon  nga tinuod   hangtud  ang  wa gyud  masayud  nga  hinambog  lang  ang  maong  estorya    motuo  niini  kay  hastang  nag-estorya  sa maong  bakak  mituo  man  usab  sa kaugalingon  niyang  hambog.

Sama  nianang  moestorya  nga  sa gamay  pa  siya  nakakulata  siya  og ungo, bisan  di tinuod  maoy  balik-balikon  niya  og  panghambog  sa iyang  mga  amigo, hangtud  matiguwang  siya  iya  na  nga balik-balikon  kay  hastang  iyang  kaugalingon  na-brain wash  niya  nga  tinuod  ang  iyang  burit.

Paita  baya  natong  mga  Pinoy, mao  nga  angay  baya nato  kining  hunahunaon kun  angay  pa ba  natong tawgon  og  brown out  ang  black  out karong  nahigmata  na ta  sa kamatuoran.