Mga reklamo ug report!

Nalipay ko kay daghan kaayo ang miresponde sa pagpublikar nako sa akong contact numbers aron nga ang publiko makapadangat sa ilang report kabahin sa illegal nga kalihukan.

Duna hinoo’y usa nga nasuko kabahin sa pagbulgar nato nga mga sakyanan sa kagamhanan giabusohan sa pipila niadtong giisyuhan niini. Apan mas daghan g’yud ang nahinangop. Hinoon, ayaw kahibulong nga dili nako matubag ang tanan.

Espoko mo ba nga gikan adtong Miyerkules hangtud kagahapon, kapin sa 100 ka report pinaagi sa text message ang akong nadawat. Dunay uban nga nangutana lang hinoon.

Dunay mireklamo ngano kuno nga daghang mga kulurum nga van wala dakpa sa atong mga tinugyanan sa balaud nga namasahero og gipasulod sa usa ka terminal dinhi sa dakbayan.

Sagdi lang, may gihan-ay na kami nga plano kabahin niana, posible himoan nato og operation. Mihatag ang informer og mga plate numbers sa maong mga sakyanan.

Dunay mireport kabahin sa usa ka “Lina” nga namaligya og kinarton nga mga tambal diha sa Carreta ug gituohan nga basin og piki kining iyang mga gibaligya nga tambal. Makig-coordinate ta niini sa ahensya nga hingtungdan.

May mireklamo kabahin sa guba na kaayo nga karsada diha sa San Fernando kay ang mga sakyanan sa pabrika og semento maoy nakaguba. Aksyoni kini palihug mga opisyal diha sa San Fernando.

Dunay gwardya sa usa ka downtown university nga miawhag nga angay unta nga magpahigayon og drugtest sa mga tinun-an nga katahapang drug users kay ang ubang tinun-an nagpuwa lang ang mga mata nga klaro kuno nga migamit og drugas.

Unya, kamong mga municipal health employees diha sa Sibonga tan-awa kuno kining bakery diha sa Simala kay ang estante pwerteng daghana nga langaw. Tinuod ni? Hugawa gud.

Diha sa Plaridel Street, Mandaue dunay mga tawo nga manghatag kunohay og T-shirt apan bugti niini baligyaan ka og tambal, apan midagsang usab ang mga mangunguot nga wala kuno tagda sa mga tanod.

Daghang sugalan sama sa mahjongan sa ilang Nely ug Maring ug tong-its sa ilang Maribel ug Metik diha sa Sitio Mangga ug Sapa-sapa, Mandaue. Ambut asa ni nga barangay kahibawo tingali ang mga polis ani. Magbuntagay kuno’g sugal.

Dunay mireklamo sa dagku kuno kaayong bayranan sa tunghaang elementarya diha sa Liki, Balamban. Susiha ang Parents Teachers Association (PTA) ninyo.

Unya may mireklamo sa cargo truck sa Obtial Construction nga naghimo og private project apan ang ilang sakyanan gibutangan kuno’g “Government project, do not delay.” Sa ato pa, dili gusto nga hunongon? May tanod sa Sudlon 1 nga gireport nga kun dunay disco maoy mag-una-una sa paghubog-hubog, pagka walay kalaki aning maong tanod kapitan!

May reklamo ka? I-text sa 0933-570-0853. Ayaw lang pagpaabot nga matubag ang tanan ha?