EDITORYAL - Ang kaguliyang sa Vatican nga mugna sa mga Cardinal

Usa  sa init  nga isyu  ning  panahona  mao  ang  pag-resign ni Pope Benedict XVI  kinsa  giingong  wa  na kaantos  sa makapasubo  kaayong  mga eskandalo nga gibuhat   sa iyang  mga    sakop  nga  Cardinal  ug  mga pari   sa palibot  ug  sa gawas  sa Vatican.

Gani  may  pipila  ka  mga  Cardinal  nga mihubo  usab  sa ilang  katungdanan  kay naapektohan  usab  sa maong  isyu.

Sa usa ka  dako  ug harianong  tigom  sa  mga  cardinal  aron  mopili og  ipuli  kang  Pope Benedict, usa  sa midumili  nga  mosalmot  uban  sa 115 ka  opisyal  sa Katoliko  nga mobotar  sa angay  itugpo  nga  bag-ong  Sto. Papa  mao si Cardinal Keith O’Brien  sa Edinburgh ug ang retiradong  Cardinal  sa Los Angeles  nga  si Cardinal Roger Mahony  sumala  sa balita  sa The Freeman nga  giuloha’g British Cardinal to skip conclave    sa pahina  28 niadtong Pebrero  27, 2013.

Si O’Brien  giingong  nahadlok  sa  taga  media nga gituohan  niyang  magtampunsisok   ug  mokuninit  kaniya  didto  sa Vatican  tungod  sa  kaguliyang  ug kagubot  sa Vatican  diin  usa  siya   si O’Brien sa   gituohang  may  labot  sa mga eskandalo  nga  mihari didto.

Sa  maong kahadlok  si O’Brien  nga  maoy  labing  dako  nga  lider  sa  mga  Katoliko  sa Britain nakahukom  sa paghubo  sa  iyang  katungdanan  nga  nakapahingangha  ug nakapakurat  sa  tanang   British.

Ang hilabihang kahadlok   ni  O’Brien  sa taga  media   nakatingala  sa kadaghanan  nga  kun  limpyo  siya  og  konsensya  nga  wa  mag-apil-apil  sa  mga  eskandalo  nga  mihugpa  sa Vatican, di  siya  mahadlok  sa  taga media.

Ang taga  media  di man mopatay  og   tawo  apan  mobuong  kini  sa dungog  sa tawong makasasala  nga maoy  nahimong  hinungdan  sa pagbahag  sa ikog ni   O’Brien  ug  mibiya  og  kalit  sa iyang  katungdanan

Samtang  si Mahony  kinsa  nabaniog nga  maoy nanalipod  sa   daghang  mga  pari    nga  giakusahang  nanamastamas  pinaagi  sa pakighilawas  sa daghang  mga bata, mipasalig  nga  motambong  siya  sa dakong  tigom  aron  mobotar  sa  Cardinal  nga angay  ipuli  kang  Pope Benedict.

Mahinumdoman  nga  sa 300 ka pahina  nga libro  nga  gitawag  nga Pontifical Secret, didto  giyagyag  sa tagsulat  nga  usa ra usab  ka dakong opisyal sa  Vatican  ang  tanang  hugaw  nga mga buhat  sa mga  “gay priests” (di lang nato Binisay-on) nga  nanamastamas  og  daghang  mga bata ug  uban  pa.