Atras-abante sa BOPK

Unsa man gayud ang tinood nga relasyon nila ni Pres. Aquino ug Vice Pres. Binay? Higala sila o kaaway?

Samtang si Binay kanunay nga magpatoo nga iyang suportahan ang mga programa sa gobiyerno ni PNoy ang iyang mga sakop sa United Nationalist Alliance (UNA) moataki sa administrasyon sa presidente.

Si PNoy usab kanunay nga mopahibawo nga anaa pa siyay pagsalig si iyang bise presidente. Gani nagkuyog pa sila karong bag-o sa pagsaulog sa anibersaryo sa EDSA People Power.

Buot bang ipasabut niini nga si PNoy nagtamud pa sa kasuod ug pagpanalipod ni Binay sa iyang inahan, kanhi presidente Cory Aquino?

Si Binay usab nagsalig sa kahumok sa kasingkasing ni PNoy ngadto kaniya busa kanunay siyang nag-abusar.

Ang utang kabubut-on ni PNoy ug sa tibook pamilya kang Binay wala pa tingali kabayri. Maimpas tingali ang ilang utang kun si Binay maoy mahimong presidente sa nasud sunod kang PNoy.

* * *

Grabe ang negatibong publisidad ang nangguwa karon nga napulihan na si Gob. Gwen Garcia kang incumbent Gov. Agnes Magpale.

Atong nasayran nga dili diay tinood nga dato kaayo ang lalawigan sa Sugbo ug nga wala kuno kini utang sigun sa gipasiatab ni suspended Gov. Gwen.

Nasayran nga ang nahabilin nga salapi sa panudlanan sa Kapitoyo kapin lang sa P200-milyones ug ang utang mokabat og kapin sa milyon.

Nasayran usab karong bag-o nga wala diay mokita ang Cebu International Convention Center (CICC) hinunoa dako kini og alkanse. Nakit-an usab ang kwestiyonable nga mga kontrata nga kinahanglang ipatin-aw ni suspended Gov. Gwen.

Kun ako’y inyong pangutan-on, makaminus tingali kini sa boto alang kang Gwen ug kang Kong. Pablo John Garcia apan dili kini makapildi kanila sa pagkakaron.

Wala hinoon ako masayud kun unsa ang kalihukan sa Malacañang pagpadaug kang Davide ug Magpale ingon man sa kandidato nga kaatbang sa suspended governor nga si Pinamungajan Mayor Gay Yapha.

* * *

Atras-abante ang baruganan sa Bando Osmeña - Pundok Kauswagan (BOPK) kalabut sa daghang mga isyu dinhi sa Cebu City.

Una niini mao ang pagpasar nila sa P600-million budget ordinance alang sa Cebu City Senior Citizen's Program. Inay sa naandan nga matag tulo ka buwan, gilatid sa maong gahin nga ihatag kini kaduha lamang karong tuiga- sa buwan sa Hunyo ug Disiyembre.

 Sa dihang niinsistir si Mayor Mike Rama nga i-release niya ang unang P2,500 sa buwan sa Abril ug matag quarter human niana bisan kun mapriso siya, mihulga si Bise Mayor Joy Augustus Young nga ilang pasakaan og sumbong ang mayor ngadto sa Ombudsman.

Apan tungod sa pagkisikisi sa hapit tanan sa 50 mil ka mga senior citizens sa siyudad natarantar si Young ug ang BOPK. Inay matag tulo ka buwan nga release ang gusto ni Mayor Rama buot sa mga hinanib ni Kong. Tomas Osmeña nga ihatag na hinoon kini matag buwan.

Atong masabut nga dili gusto ang BOPK nga ihatag ang P2,500 sa Abril kay nahadlok sila nga makatabang kini sa kandidatura sa mayor. Palihug ayaw gamita sa inyong pamolitika ang hinabang alang sa mga senior citizens!

Sa laing isyu, buot unta ibaligya ni Kong. Tomas, sa dihang mayor pa siya, ang Cebu City Medical Center (CCMC) kay wala kuno kini maayong pagkadala.

Karon nga natarong na ang pagpadagan sa maong tambalanan ug awardee gani ang director niini nga si Dr. Gloria Duterte miatras si Kong. Tomas sa pagdispatsar niini.

Ang tawo diay nga gidistino ni kanhi mayor Osmeña sa maong ospital ang problema dili ang mga doktor nga maoy nagpadagan niini.

* * *

Moataki ug moabante ang BOPK aron pagpiang kang Mayor Rama apan moatras sila kun ilang makita nga paluyuhan ang mayor sa katawhan.

Akong tambag sa BOPK, himoang leksiyon ang nahitabo sa Mandaue City diin giharos og pildi ni Mayor Jonas Cortes ang iyang mga kaatbang, gawas kang Konsehal Editha Cabahug, tungod sa kalagut sa Mandauehanon sa paglisudlisud sa mga konsehal sa ilang mayor.

* * *

Nganong nikunhod man ang rating sa mga kandidato sa United Nationalist Alliance (UNA)?

Ania kining survey result nga gihimo sa Social Weather Stations (SWS) niadtong Pebrero: 1) Legarda 2) Escudero 3) Cayetano 4) Villar 5) Poe 6) Pimentel) 7) Binay 8) Trillanes 9) Ejercito 10) Aquino (Bambam) (11 Angara 12) Zubiri 13) Enrile 14) Honasan 15) Madrigal 16) Magsaysay, R 17)Gordon 18) Hontiveros 19) Maceda 20) Cojuangco, etc.

Siyam sa Team Pinoy samtang tulo lamang ang nasulod sa "Magic 12." Nangatagak pa gayud sila sa ilang kanhi nahimutangan.

Tinuod ba ang PNoy magic?

Email: [email protected]