Ikatulong hilisgutan: Mga sukaranang pagtulon-an sa simbahan

Dugang pa Ang Catechism of the Catholic Church nagkanayon: “Gipapahawa ni Jesus ang mga yawa ug pinaagi kaniya ang Simbahan ang nakadawat sa maong gahom ug pangatungdanan.”[9]  Kini tungod kay ang maong pangalagad sa pagpapahawa sa mga demonyo mao ang sukaranang timailhan nga ang gahom ug gugma sa Dios mas labaw pa kaysa bisan unsang gahom sa kangitngit.

Matud pa ni Padre Jojo Zerrudo usa ka eksorsista: “Ang eksorsismo dili mahitungod sa yawa, hinunoa mahitungod kini sa Diosnong gugma ug kalooy. Dili buot sa Dios nga pakaulawan sa yawa ang tawo nga bililhon kaayo alang kaniya. Mao nga tumong ug tuyo sa Dios nga malingkawas ang tawo nga iyang gihigugma pag-ayo nga tungod niini iyang gipadala ang iyang bugtong anak aron si kinsa kadtong motuo kaniya dili mamatay kondili makabaton sa kinabuhing dayon… [10] gikan sa bisan unsang pagpanglupig sa gahom sa dautan.

Ang suliran kalabot sa dautan usa ka mabug-at nga palas-onon sa tawo lamang. Dili ni niya mahimo nga siya lang. nagkinahanglan siya og kauban sa pagpas-an niini. Si Francois Muriac nagkanayon: “Ang Yawa usa ka “Siya” o “Sila” kang kansang ngalan Legion nga nialirong ug niangkon kanato sa mga higayon nga kita wala sa kahimtang  sa grasya.”[11]  Si San Pedro nipahinumdom kanato ning mosunod:

“Pagmaigmat ug pagbinantayon kamo kay ang inyong Kaaway nga mao ang Yawa naglibot-libot kaninyo sama sa liyon, nangita og tukbonon. Lig-ona ang inyong pagtuo ug sukli siya kay nasayud kamo nga inyong isigkamagtutuo sa tibuok kalibotan, gisulayan usab sa samang alantuson.”[12]