Ang taas nga panglantaw ni TZO

Sa miaging semana napatik sa lokal nga pamantalaan dinhi sa Sugbo ang pamahayag ni Presidential Assistant for Climate Change Elisea Guzon ang kadaut nga mamugna sa pagpabaya sa katawhan sa suliran sa kalikopan, ang kahugaw sa palibot ug sa tubig nga gipanggamit sa katawhan dinhi sa Sugbo.

Samtang ang Metro Cebu Water District mipresentar usab ngadto sa mga lokal nga kagamhanan dinhi sa Sugbo sa pag- awhag sa ilang mga molupyo sa paglimpyo sa ilang mga septic tank kada tulo ngadto sa lima ka tuig tungod kay peligro kini nga makamugna og sakit niadtong mga tawo nga nagsalig sa ilang tubig nga mainom nga nagagikan sa ilawom sa yuta. Sigun sa pagtoon katloan ka porsiyento sa mga sakit ang nagagikan sa hugaw nga tubig.

Giingon usab nga peligrong makasinati og grabing mga pagbaha ang Metro Cebu kun ugaling pabiling baliwalaon sa iyang kagamhanan ang mga nagusbat nga tinubdan sa tubig ug kun dili pangitaan og paagi nga masawod ang mga tubig uwan. Busa gisugyot ngadto sa mga lokal nga kagamhanan nga imando ngadto sa mga kontraktor ang mga umaabot nga mga building constructions nga apilan kini og mga water facility nga makasawod sa tubig uwan.

Usa ka higayon usab niana gisugyot sa Asian Development Bank ang pagpalapad sa paggamit sa limpyo nga enerhiya ug ang pagmugna og malungtaron nga kalamboan nga motakdo sa nausab na nga klima.  

Kaniadtong tuig 2011 kun wala ko masayop mipalabang og ordinansahon si bokal Teddy Ouano nga nag awhag sa tanang mayor sa lalawigan sa Sugbo sa pagmugna og mga Septage Management program alang sa tukma nga paghipos ug paglabay sa mga hugaw nga gikan sa mga balay ug patigayon.

Sa maong tuig mipalabang usab siya og ordinansahon nga nagmugna sa Provincial Water and Sanitation Authority of the Province. Gipalabang usab niya ang ordinansahon nga naghimo sa Environmental Code of the Province of Cebu ug gipangamahanan ang ordinansahon nga nagsugyot nga himoon ang Green Building Program ug ang paghatag og mga insentibo sa mga pribadong developer nga mosagop niini.    

Ambot kun sulagma ba lang pero murag mas nakauna sa iyang mga balaudnon nga gipalabang sa junta provincial sa lalawigan sa Sugbo si bokal Teddy Ouano kay sa mga gisugyot karon sa Presidential Assistant for Climate Change nga si Elisea Guzon, Metro Cebu Water District ug Asian Development Bank . Hinoon dili paunahay ang pagpakabana sa atong kalikopan. Manghinaot lang ko nga ang uban diha sa junta provincial matakdan sa taas nga panglantaw ni bokal Teddy Ouano.