Ang mga hunahuna nga gipadayag dinhi iya ra sa tagsulat ug walay labot ang Banat

News ug mga sakop niini.Ang kahulogan sa kinabuhi

Upper Canduman, Mandaue City

Daghan kong nabasa nga mga libro mahitungod sa mga tawo nga nangita sa kahulogan sa kinabuhi. Akong gisubay og maayo kada-dahon o pahina sa libro. Sa pamasin nga makat-on ko sa ilang makat-onan sa pagpangita nila sa kahulogan sa kinabuhi. Kun sa Iningles pa “Meaning of Life.” Pagkahuman, wa gyud ko’y nasabtan. Kay igo lang silang nibiyahe sa lainlaing lugar. Nakigsandurot sa mga tawo. Niapil sa mga kalihokan sa katilingban. Ang uban kanila, nibalhin og tinuhoan. Ang uban nagtukod og relihiyon. Apan wa gyud ko’y konkreto nga nakat-onan. Dugay na ning mga higayona nga akong nabasa ang maong mga libro. Wa lang gyud nako hinuktoki pag-ayo kun unsa gyu’y kahulogan sa kinabuhi.

Apan karong tuiga, 2013, daw nasabtan ko na. Nadiin-diin sab ko sa akong kinabuhi kaniadto. Nibiyahe ko’g lainlaing lugar sa Pilipinas. Kay una nakong kurso. Nautical. Unya nakasakay ko’g barko nga Davao run. Kun ang barko mobiyahe sa Davao, Davao run ang tawag sa mga marino ana. Na-agregawo ko sa M/V Tagbilaran City sa William Lines, kaniadto. Gikan sa Manila mongadto’s Tagbilaran. Gika’s Tagbilaran, mongadto sa Dumaguete City. Dayon Zamboanga City, dayon General Santos, unya Davao, Balik sa Manila. Wa niagi og Cebu. Nakahuman gyud ko’g duha ka tuig nga requirements para maka-take og board exams para-Third Mate.

Duha ka tuig nakong sinati sa kinabuhing seaman. Dili hinuon overseas. Local o inter-island lang. Diha sab nako hibaw-i nga dili ko ganahang motrabaho sa barko. Busa ni-shift ko’g laing kurso Commerce. Unya nag-self-supporting na lang ko. Kay matud ni Papa, tagsa ra ka kurso nga mogasto ko sa akong anak. Napulo mi ka buok. Busa, pasensiya. Nakaamo ko og abogado, unya natakdan sa kagaw sa pangabogar. Maong wa damha nga naabogado sab ko. Apan bisa’g unsa pay kurso o propesyon sa tawo, ang kahulogan sa kinabuhi mao ra gyud. Komon na sa tanang tawo.

Unya kay kada-adlaw, mabuntag mag-hike man gyud ko, usahay gani mag-jogging, naamgohan lang nako ang kahulogan sa kinabuhi. Gipakita na ko’s Ginoo nga gusto pa kong mabuhi. Kay hapit na ko mamatay kausa ka higayon. Sama sa lalaki nga nilangyaw kay mangita sa iyang suwerte. Wa gyud niya hipalgi ang suwerte. Nipauli na lang siya. Unya diha ra diay sa ilang silingan iyang suwerte. Way pari o pastor nagtudlo nako. Hinuon dunay mga libro sa manggialamon nga akong nabasa, lakip na ang bibliya ug Reader’s Digest.

Sa akong pag-inusara sa paghike, nagpasalamat ko sa maayong panahon ganihang buntag. Way ulan. Nagpasalamat ko sa Diyos nga buhi pa ko rong adlawa. Nag-hike ko kay gusto pang mabuhi. Kay nahigugma sa kinabuhi. Diha nako hiamgohi nga naa ra diay sa gugma ang kahulogan sa kinabuhi. Kay natawo ta tungod sa gugma sa atong ginikanan, kinahanglang magpakabuhi ta sa gugma. Nia ra diay sa atong dughan ang kahulogan sa kinabuhi. Ang Diyos nihimo sa tawo tungod sa iyang gugma sa tawo. Busa, balosan nato ang Diyos og gugma. Gugma lang ang gamhanan ning kalibutana. Gugma sa Diyos, gugma sa kaugalingon, gugma sa kinaiyahan, gugma sa kinabuhi, ug gugma sa isigktawo. Gugma sa kapikas o uyab, materyal o physical lang nga gugma. Ang labing bililhon nga gugma ug universal, ang gugma sa isig ka tawo.

Naa ra ang kahulogan sa kinabuhi. Kay nahatagan ka’g kinabuhi tungod sa gugma, magkapabuhi ka sa gugma, sa tibuok nimong kinabuhi. Kay ang imong anak, apo ug apo sa apo, mao say mosumpay sa imong pagpakabuhi sa gugma. Ang way gugma kanunay dautan ang pagbati batok sa isig ka tawo. Diyos ray iyang  gihigugma ug relihiyon, nga nagtuman sa tanang gidili, basta lang mailhan siya nga miyembro anang grupoha. Ang kahulogan sa kinabuhi, naa ra sa atong kasingkasing.

Happy Valentine’s Day to everyone.