Mangisog na ba gyong Comelec?

Sakto ang pasidaan sa Commission on Elections (Comelec): Ang epal nga mga politiko sa wa pa ang Pebrero 12 ning tuiga maisip nang mga kriminal human sa pormal nga pagsugod sa campaign period alang sa mga kandidato pagka senador ug party-list groups.

Ang mga namintaha pagpapilit sa ilang campaign posters nakapamikat sa ilang mga kaatbang ug sa taga Comelec tungod sa binuang nga desisyon sa Korte Suprema nga ang premature campaigning niadto freedom of expression na karon. Apan sugod niadtong Pebrero 12, ang Comelec duna nay hingpit nga gahom sa pagpatuman sa mga lagda sa makiangayong piniliay.

* * *

Tungod sa masuk-anong mga pasidaan ni Comelec Chairman Sixto Brillantes Jr. nga di sila managana pag-disqualify sa malapason nga mga kandidato, bisan kinsa pa sila ug bisan pila pa sila ka buok, may sukaranan ang paglaom nga lahi ang piniliay karong Mayo 13 kay sa nangagi. Nga mahimong mapatuman na gyud ang mga lagda ning higayona. Lahi sa nangagi nga paugat ug papating maoy nipatigbabaw.

Tuod man, may maayong mga timaan sa bag-ong kaisog ug determinasyon sa Comelec. Apan sa pikas nga bahin abunda sab ang mga timaan nga, sama sa naandan, mangiyugpos lang gihapon ang pipila ka opisyal sa Comelec atubangan sa nangalisbo nga pagpanginsulto sa mga botante.

* * *

Usa sa maayong mga timaan mao ang gihimo ni Comelec Spokesman James Jimenez: Gi-dokumento niya ang campaign posters ni Senatorial Candidate Sonny Angara nga mas dako kay sa gitakda ug gipapilit sa gidili nga mga dapit. Gitawag niyang atensiyon ni Angara ug gipasidan-an nga ikiha. Nangayo og pasaylo si Angara ug nisaad nga ipatangtang ang nakalapas niyang posters.

Apil sa di maayong timaan mao ang postura ni Comelec 7 Regional Director Temie Lambino. Nga bisan gipakita na og mga hulagway sa paggamit sa mga sakyanan sa gobyerno alang sa politikanhong kalihokan, nanghunaw lang gihapon nga magpaabot pa sila nga may mopasaka og pormal nga reklamo.

* * *

Aron pagseguro nga ang kaisog ug kakugi ni Jimenez, ug di ang katalawan ug katapolan ni Lambino, maoy manakod sa ubang mga opisyal sa Comelec, angay’ng manginlabot ang mabuot ug nagpakabana nga mga botante. Kay pipila ra man ang election officers ug mga kawani sa Comelec angay silang tabangan pagpatigbabaw sa kaligdong sa piniliay.

Kun ang mga botante maoy magbantay, mamadlong ug mo-dokumento sa tanang kalapasan sa mga lagda sa kampanya, sama ra nga ang Comelec may mga mata ug dunggan sa tanang suok ug busa way kalapasan nga makalusot. Hinaot nga ang mga piliunon mismo madutlan na sa kaikog ug kauwaw. Ug maningkamot pagdaog pinaagi sa pagsandig sa ilang katakos ug track record.

* * *

Email:  [email protected]