"Charge to experience"
Nidangop na sa National Bureau of Investigation ang tinun-an sa University of San Jose Recoletos nga maoy sentro sa iskandalo nga namugna sa sex video nga mikuyanap daw sama sa kagaw sa sakit dinhi sa Sugbo.
Ang tinun-an giubanan sa mga opisyal ug mga abogado sa tunghaan. Ilang giawhag ang NBI nga imbistigahon aron masayran kinsay responsable pag-upload sa video diha sa Internet.
Apan dako ang hagit nga atubangon sa ahensiya aron pagsulbad sa kaso. Dili ingon niana kasayon ang pagsusi niini.
Mas dali pa masakpan ang pagpanghulga gamit ang text kaysa pagsusi kinsay nag-upload sa video.
Kini tungod kay dili lang dinhi sa Pilipinas kinahanglang himuon ang imbistigasyon. Tungod kay gi-upload sa Internet ang video kinahanglang ilakip pagsusi diin nga social networking site unang nakit-an ang video.
Sigun sa akong nahibaw-an dunay kopya nga nakit-an sa Youtube ug duna poy diha sa Facebook.
Kining maong mga social networks pulos gidumala gawas sa Pilipinas. Sa ato pa kun himuon gyud sa NBI ang seryoso nga imbistigasyon niini kinahanglan sila nga makig-alayon sa mga tagdumala niining maong mga kompaniya aron masusi ang records diha sa ilang servers pagsuta unsay IP address nga gigamit sa unang nag-upload sa video.
Dinhi posible nga masugdan na ang pagtrace sa tawo nga mi-upload. Apan hangtud nga dili ni mahimo sa NBI nagduda ko ila bang matrace ang responsable pag-upload sa video.
Nahinumdom ko nga niadtong unang kaso nga giimbistigahan sa NBI nga naglambigit gihapon og video nga giupload sa Internet wala gyud nila masulbad tungod sa kalisod sa proseso sa imbistigasyon.
Nahinumdom mo sa kaso niadtong mahuyang nga gisangsangan og lata sa perfume ang sampot? Kadtong naila sa social network nga "Blacksuede scandal"?
Dili ba gisusi man sab to nganong naupload sa Internet ang video sa operasyon? Apan wala gyud nila mailhi kinsay nag-upload tungod kay kuti kaayo ang proseso sa imbistigasyon.
Kinahanglan nga ang gobyerno gyud sa Pilipinas maoy makig-alayon sa gobyerno sa Amerika diin tua magbasi ang mga kompaniya nga nagmintinar sa social networking site.
Gawas sa kakuti gasto sab ni kaayo hinungdan nga gitak-upan nalang sa NBI ang ilang imbistigasyon og nakontento nalang sila sa pagpasaka og kasong administratiba batok sa mga doktor sa Vicente Sotto Memorial Medical Center tungod sa pagbugalbugal sa pasyente samtang nag-opera basi sa nakita sa video.
Niining kaso sa tinun-an sa USJR posible nga ingon sab niini ang dangatan. Gawas og andam mogasto ang tunghaan hangtud didto sa gawas sa nasud aron matrace kinsay responsabli pag-upload diin para nako impraktikal na nga buhaton.
Ang posible nga mahitabo niini nga laing kaso ni sa "charge to experience".
* * *
- Latest
