Pasiuna

Sa niaging hilisgutan sa atong lindog ning atong Banat News, atong gihimo ang daklit saysay sa paranormal ngadto na sa isyu sa Demonic Possession (gipangyawaan, gipanulayan). Ingon man ang mahitungod sa mga haunted houses nga maoy usa ka sanglitanan sa gitawag natong infestation. Apan kining atong hilisgutan sa atong lindog karon.

Luwasa kami sa dautan, himuon nato ang mas detalyadong pagpatidlum ginamit mismo ang pagtulon-an sa simbahan ug uban pang mga basahon nga dunay kalambigitan niini. Tumong ug tuyo niini nga mahayagan ang mga magbabasa labi na ang anaa sa mga tulonghaan aron sa ingon dili dayon mahimo ang usa ka sensationalized nga pag-atubang sa maong isyu nga madakop dayon ingon nga sumsoman sa mga tabi-tabi ug panahon sa mga nagkadaiyang mga hunahuna o tumatan-aw. Ning maong lindog atong himuon ang pagduki-duki ug unta pinaagi sa gilatid nga han-ay sa pagpadayag kita mahibawo ug makakat-on kun sa unsa kita nalambigit sa kalibutan sa mga espiritu ug sa demonyo gyud mismo. 

Sa unsang paagi sila nakaapekto kanato. Ang kahulogan sa pagpangalagad sa Eksorsismo ug pagpalingkawas (Exorcism and deliverance Ministry). Ang pagtulon-an sa simbahan mahitungod ning maong hilisgutan nga nagasukad sa Balaang Kasulatan ug sa mga nagkadaiyang dokumento. Ang Pastoral nga implikasyon nga gilatid sa Roman Ritual Vol. II, ingon man ang praktikal nga mga sugyot sa mga eksorsista sama nila ni Jose Francisco Syquia sa Archdiocese of Manila Office of Exorcism. Matag adlaw sa tawhanong kinabuhi, adlaw usab sa espirituhanong pakiggubat natong mga binunyagan batok sa gahom sa dautan.