Duol ra ang disgrasya

Wala g’yud ko masayop sa akong giingon kaniadto nga ang sementado nga landscape sa tunnel diha sa eskena McArthur Boulevard ug Legaspi Street duol sa Plaza Independencia makamugna og aksidente sa mga motorista.

Nalabyan nako kaniadtong miaging gabii ang usa ka kotse nga maayo g’yud nga pagkadumbol sa sementado nga landscape. Unsaon nga ang maong semento nga gi-landscape gawas nga taas ra kaayo, walay pintal aron makita unta dayon kini panahon sa gabii.

Si Mayor Michael Rama pabor sa akong sugyot nga ibanan ang maong landscape aron dili kini makahatag og risgo sa mga motorista apan ambot ug unsa nay gisangpotanan sa iyang gimando ngadto sa kadagkoan sa CITOM.

Ang gimandoan ni Rama nga makig-coordinate sa kadagkoan sa Department of Public Works and Highways (DPWH) aron unta mapagamyan ang landscape mao si Joy Tumulak nga executive assistant sa CITOM.

Maayo gani kay wala mabalitok ang kotse apan guba g’yud kaayo ang bumper sa sakyanan. Ang mga sakyanan nga gikan sa MJ Cuenco Avenue unya moliko sa Plaza Independencia paingon sa McArthur Boulevard maoy dunay risgo nga mabangga anang gi-landscape sa tunnel.

Awhagon nako ang kadagkoan sa DPWH nga tan-awon ninyo ang maong lugar. Swerte na lang nga bumper ra sa sakyanan ang naguba. Kun dili ibanan ang maong sementado nga landscape, sigurado ko nga duna pay laing aksidente diha sa maong dapit.

* * *

Saludohan nako ang grupo sa akong amigo nga si Chief Inspector George Ylanan kay giapil na usab nila paghimo’g kampanya ang mga tigpasiugda sa masyaw.

Klaro man kaayo nga nagpadayon ang kalihukan niining mga tigpasiugda sa masyaw kay wala may hunong ang pag-imprinta sa mga tipsheets. Maayong apilon ninyo pagronda sir George ang tighimo nianang mga tipsheets sa masyaw diha sa Sikatuna Street.

Ang dakbayan dunay ordinansa nga nagdili sa pagpanghimo, pagbaligya ug bisan paghupot sa mga tipsheets. Apan kilid sa usa ka department store diha sa Manalili dayag kaayo ang pagbaligya og numero sa masyaw.

Mosamot ko pagsaludo sa mga sakop sa Regional Special Operations Group (RSOG) kun maronda nila kining mga tigpasiugda sa masyaw nga mikuyanap pag-ayo bisan sa hilit nga mga lungsod.

Dinhi sa dakbayan mora’g nakontrolar na sa kapolisan ang operasyon sa mga video karera machines ug moli-moli, apan wala pa kaayo masanta nila ang masyaw. Sigurado man ko nga nakaila kamo sa mga dagkong tawo nga nagpaluyo niining maong mga sugal.

Fight g’yud sir George!