Salimo-ang sa mga Garcia

Akong kinasingkasing nga pahalipay ngadto sa among chairman sa The Freeman ug executive vice president sa University of the Visayas nga si Sir Dodong Gullas tungod sa duha ka butang.

Una, tungod sa pagsaulog sa iyang ika-79 nga kasumaran sa adlaw’ng natawhan.

Ikaduha, tungod sa malampuson nga “Halad Pasalamat” uban sa ABS-CBN Halad sa Kapamilya nga gihimo sa Gullas Medical College sa Banilad. Gatusan ka mga tawo ang nakigselebrar sa adlaw’ng natawhan ni Sir Dodong pinaagi sa pag-angkon sa nagkadaiyang serbisyo medical ug non-medical.

Gawas sa medical consultation, patient counseling ug pa-resita, adunay eye examination, dental services, bloodletting, blood-sugar testing, panuli, cervical cancer screening, ECG, legal aid and services, drug awareness seminar, ug basic bookkeeping. 

Ang mga non-medical services mao ang massage, reflexology ug acupuncture, tupi ug cellphone repair.

Miabag usab paghatag og serbisyo ang National Statistics Office, Philhealth ug veterinary service.

Ang among general manager sa The Freeman nga si Sir Boy Mendoza uban sa The Freeman Foundation, mihimo og feeding program atol sa kalihukan.

Ang maong Halad Pasalamat usa ka buhat ni Sir Dodong tungod sa iyang pagkamahigugmaon sa mga kabus - hiyas nga nakuha gikan sa iyang mga ginikanan nga silang Don Vicente Gullas ug Doña Josefina “Inday Pening” Rivera Gullas.

Belated happy birthday, Sir Dodong!

* * *

Ang abogada ni suspendidong gobernador nga si Gwendolyn Garcia, iyang anak nga si Atty. Christina Garcia Frasco, mipadala og demand letter ngadto kang Provincial Administrator Eduardo Habin ug sa ubang mga opisyal. Makakatawa kita nga maluoy sa mga Garcia niining demand letter nga gidapala sa anak ni Gwen Garcia ngadtong Habin ug nilang OIC Provincial Engineer Hector Jamora, Civil Security Unit operations chief Valentino Cruz, chief security sa Tactical Security Agency, Police Regional Office director Marcelo Garbo ug Regional Public Safety Battalion commanding officer Leopoldo Cabanag.

Ang demand letter nag-demanda kanila sa pagpugong sa ubang tawo nga makagamit sa Office of the Governor gawas lamang sa inahan ni Atty. Christina Garcia Frasco. Gitataw niini nga ang iyang inahan maoy gobernador sa Cebu bisan sa iyang pagkasuspenso.

Makakatawa kita nganong demand letter gyud ang gipadala sa abogada. Mura og naningil og utang.

Apan unsay ipasabot ni Atty. Frasco, dili ipagamit ang Office of the Governor bisan wala nay mag-okupar niini kay ang iyang mommy nga nasuspenso tungod sa pagpanglupig, unya aduna pa gyuy laing suspension order nga nag-ung-ong, dili na makagamit sa opisina?

Naglibog ko unsay dagan sa hunahuna niining Atty. Frasco nga usahay makalibog man og mga aksiyon pagdepensa sa iyang inahan.

Human na masayop si Atty. Frasco sa iyang aksiyon pag-contest sa suspension order gikan sa office of the President.  Imbes appeal ubos sa Rule 43 ang iyang buhaton, misang-at na hinuon kini og puro petition for issuance of temporary restraining order (TRO), sayop nga remedy. Kining nagsalimoang nga demand letter ni Atty. Frasco gitubag hinuon ni Atty. Democrito Barcenas, ang tigpamaba sa Liberal Party sa Sugbo. Matud ni Barcenas nga ang opisina sa gobernador diha sa Kapitolyo dili iya ni Gwen Garcia.

Dugang niya nga si Gwen Garcia dili na gobernadora sa lalawigan tungod sa iyang pagka-suspenso.

Misamot na akong kalibog sa dihang miingon ang kampo sa mga Garcia nga bisan si Agnes Magpale ang acting governor sa lalawigan, wala kini gahum pag-padlock sa opisina sa gobernadora, kay matud nila, ang korte lamang ang makahimo niini.

Nganong ang korte man? Kun ingon niini ang standard, puerteng luoya sa mga opisina sa gobernador kay dili mapadlakan kun walay mando sa korte. Uroy og walay mando nga muabot, unsaon naman lang nang mga kabtangan ug mga dokumento diha?

Unsaon naman lang nang mga sakop sa Guardians nga nag-escort-escort ni Gwen Garcia, mao nay mag-opisina?

Hinuon, kun nakita ni Atty. Frasco nga sayop ang gihimo ni Magpale pagpadlak sa opisina sa iyang inahan nga suspendido, maayong ato siyang hagiton pagkuwestiyon niini sa korte.

Maayong iyang iyagyag diha sa iyang reklamo ang balaod ug jurisprudence nga ang gobernador nga gisuspenso, sama sa iyang inahan, mao pa gihapon ang ilhon nga gobernador ug mao pa gihapoy magbuot sa tanan. Makakatawa man kita ug maglibog, apan maluoy usab kita kay sa nahidangatan nila, naghinobra na ang salimo-ang sa mga Garcia.

Kinsa ba uroy anak nga magtuo nga iyang inahan nga kanhi gitahod, gitamod ug gikahadlokan mawad-an og gahum sa kalit nga panghitabo.

Nagtuo pa gihapon sila nga silay gamhanan sa lalawigan bisan nag-anam na og kahilis ang suporta gikan sa kinabag-an human mahibaw-i unsay tinuod nilang kolor.