Leksyon ni Pope

Dunay pagtulon-an kon leksyon nga gibilin si John Pope alang kanatong mga Sugbuanon. Pagtulon-an o leksyon diin wala unta mahitabo ang dugoong panghitabo didto sa Palace of Justice kun nahikat-onan pa kini sa sayo.

* * *

Ang pagtulon-an kon leksiyon mao ang dili unta lugakan ang security kon seguridad diha sa mga korte sud sa Palace of Justice, diin nahitabo ang pagpamusil patay ni John Pope lakip na ang iyang kinabuhi.

* * *

Diha toy panahon nga grabeng estriktoha ang pagsud sa Palace of Justice. Rikisahon gyud ang buot mosud ug pangitaan gyud og ID. “No ID, No Entry.”

* * *

Gilugakan kining istrikto nga lagda ug mao tong naka-smuggle si John Pope og armas nga iyang gigamit sa pagpamusil sa tulo ka tawo sud sa korte -- duha ang patay, gawas kaniya, ug usa ang angol kinsa atol ning pagsuwat nato niini anaa pa sa intensive care unit sa ospital.

* * *

Kay nahitabo naman ang trahedya, gibalik nasad ang kaistrikto sa seguridad kon security diha sa Palace of Justice. Ning pipila na ka adlaw’ng milabay pwerteng taasa sa linya sa mga tawo nga buot mosud sa Palace. (See Banat News, front page, Enero 29/13).

* * *

TRIVIA. Maayong buntag sa atong mga higala diha sa Taboan market ug mga dapit libot niini. Daghang salamat sa inyong suporta sa Banat News.