Ang hustisya ug si Pope

Gipusil patay sa Canadian national sulod mismo sa hukmanan sa dakbayan sa Sugbo ang abogado ug ang iyang kliyente nga doktor. Gawas sa abogado ug doktor, anaa pa usab sa talandugon nga kahimtang ang piskal nga iyang giapil sa pagpusil. Tungod ning maong hitabo ang mga piskal nagpanon sa pag-adto sa Commission on Election aron sa pagpangayo og exemption sa gipatuman nga gun ban nunot sa nagsingabot nga piniliay. Ang ka piligro sa ilang trabaho ang nag-unang rason sa mga piskal kun nganong gusto nilang dili malakip sa gun ban.

Kun ang ka piligro sa trabaho sa mga piskal ang rason kun nganong dili sila gustong malakip sa election gun ban mas maayo segurong wagtangon na lamang sa Commission on Election ang gipatuman nga gun ban tungod kay mahulog kining walay pulos tungod kay piligro man kanunay ang kinabuhi sa tanang nagpuyo ning nasura ug ning kalibotana. Hangtod anaa pay mga kriminal nga nagsuroy-suroy sa atong palibot nga nagpaabot lang sa saktong panahon sa paghimo og krimin dili gyod ta makaseguro sa kaluwasan sa atong kinabuhi ug kaseguroan sa atong mga butang. Maong sa atong pagpakabuhi ning kalibotana giubanan kita sa ka piligro sa kinabuhi.

Ang pagdala og armas sa mga piskal dili gihapon makahatag kanila og kaluwasan tungod kay ang tawong gusto gayong mohimo og krimin dili magpahibalo sa iyang biktimahon ug kutob sa iyang mahimo likayan gayod niya kining makahibalo busa dili makalingkawas kaniya ang mga piskal.

Kun gusto man nga likayan sa mga piskal ang ka peligro sa kinabuhi kinahanglan sila nga motabang sa pagpatunhay sa hustisya nga dili binayran kay ang hustisyang binayran ug baligya mao ang rason kun nganong adunay mga tawo nga mokumkom na lang sa balaud sa  ilang mga kamot.

Ang tawo nga wala ma-influencia sa ginadiling drugas ug anaa pa sa sakto niyang pangisip dili mohimo og salaud o krimin kun wala siyay igong rason. Busa kadto si John Pope adunay rason kun nganong iyang gihimo ang krimin ug usa sa gitoohang rason mao ang iyang pagka dismaya sa sistima sa hustisya dinhi sa atong nasud. Busa kun gusto man nato ug sa mga piskal nga wala nay laing John Pope nga mohulga sa ilang kinabuhi tarungon nila sa pagdumala ang sistima sa atong hustisya.