Ang wake up call

Gisugat og krimin ang bista sa kaso sa hukmanan sa dakbayan sa Sugbo niadtong Martes human mamusil patay ang usa ka langyaw ngadto sa kihanti ug abogado niini sulod sa sala ni Judge Pamela Baring sa Municipal Trial Court Branch 6. Naa pa usab sa talandugon nga kahimtang ang usa ka piskal nga gipusil usab sa mao gihapong langyaw. Patay usab ang langyaw human siya magpusil sa iyang kaugalingon.

Ang maong pagpamusil dakong tamparos sa mga opisyal sa hukmanan ug sa iyang mga security personnel. Tamparos usab kini sa kapolisan nga gitahasan sa Commission on Election sa pagpatuman sa election gun ban. Hinaut pa unta nga kining maong tamparos makapahigmata sa mga security personnel sa atong hukmanan ug sa kapolisan nga puwede ra diay nga maagian sa ilang tungod sa mga tawong dautan.

Sa krimin nga nahitabo sa sulod sa hukmanan sa dakbayan sa Sugbo dili makapanghunaw ang atong kapolisan sa ilang kapalpakan tungod kay ang kriminal una nga miagi sa ilang tungod sa wala pa kini moagi sa tungod sa mga guwardiya sa palacio sa hustisya.

Angayan nga hinumduman sa atong kapolisan nga sa wala pa moabot sa hukmanan ang langyaw nga namusil sa abogado, doktor ug piskal yano ra kining nagdala sa iyang armas nga gigamit sa pagpamusil. Kun sa gawas pa lamang unta sa hukmanan nasayran na sa mga polis nga nagdala og armas ang langyaw hayan wala gyod untay krimin nga mahitabo. Kun wala pa unta lugaki sa kapolisan ang ilang pagbantay sa atong palibot, magpanuko unta seguro sa paghimo og krimin ang mga kriminal ug kadtong mga tawo nga naglaraw sa paghimo og krimin.

Karon ang palacio sa hustisya gipabantayan na og mga polis gawas sa kaugalingong security personnel nga iya sa hukmanan ug ang ilang pagbantay gipahugtan. Kun ang pagbantay sa mga polis sa atong palibot susama pa unta sa ilang gihimo karon human mahitabo ang krimin labing seguro dili ta mahadlok nga magsuroy-suroy.